കഴിഞ്ഞ വർഷത്തെ പ്രളയത്തെ തുടർന്ന് മുഖ്യമന്ത്രിയുടെ ദുരിതാശ്വാസ ഫണ്ടിലേക്ക് ലഭിച്ച കോടിക്കണക്കിന് ധനസഹായം ഇതുവരെയും ദുരിതബാധിതർക്ക് ലഭിച്ചിട്ടില്ലെന്ന നടൻ ധർമജൻ ബോൾഗാട്ടിയുടെ പരാമർശത്തെ വിമർശിച്ചും അനുകൂലിച്ചും സമൂഹമാധ്യമങ്ങൾ. സർക്കാരിനെ വിമർശിച്ചതിന് ഒരു വിഭാഗം സൈബർ ആക്രമണം നടത്തിയപ്പോൾ സത്യം പറയാൻ ധർമജൻ ധൈര്യം കാണിച്ചു എന്നാണ് മറുവിഭാഗത്തിന്‍റെ നിലപാട്.
ഒരു സ്വകാര്യ ചാനലിന് നൽകിയ പ്രതികരണത്തിലായിരുന്നു ധർമജന്‍റെ വിവാദ പരാമർശം. 'കഴിഞ്ഞ പ്രളയത്തിന് ശേഷം മുഖ്യമന്ത്രിയുടെ ദുരിതാശ്വാസ നിധിയിലേക്ക് വളരെ പെട്ടന്ന് തന്നെ കോടികൾ എത്തി. എന്നാൽ അതേ വേഗതയിൽ ആ തുക അർഹിക്കുന്നവരുടെ കൈകളിൽ എത്തിയില്ല,' എന്നായിരുന്നു ധർമജന്‍റെ പ്രസ്താവന. താരം താമസിക്കുന്ന വരാപ്പുഴ പഞ്ചായത്തിനെ ഉദാഹരിച്ചായിരുന്നു ധർമജന്‍റെ പ്രതികരണം. ഈ പ്രസ്താവനയാണ് വ്യാപകമായ വിമർശനത്തിന് വഴി വച്ചത്. കഴിഞ്ഞ പ്രളയത്തില്‍ ധർമജന്‍റെ വീട്ടിലും വെള്ളം കയറിയിരുന്നു.