ആരാധകർ ഏറെ പ്രതീക്ഷയോടെ കാത്തിരുന്ന മമ്മൂട്ടി ചിത്രം 'സിബിഐ 5: ദ് ബ്രെയ്‌ൻ' റിലീസിനൊരുങ്ങുകയാണ്. ചിത്രത്തിന്‍റെ പുതിയ പോസ്റ്റർ മമ്മൂട്ടി കഴിഞ്ഞ ദിവസം റിലീസ് ചെയ്‌തിരുന്നു. മലയാള കുറ്റാന്വേഷണ സിനിമകളിലെ ഏറ്റവും മികച്ച സീരീസായ സിബിഐ ഡയറിക്കുറിപ്പിന്‍റെ അഞ്ചാം ഭാഗത്തിന്‍റെ പ്രഖ്യാപന സമയം മുതൽ സമൂഹ മാധ്യമങ്ങളിലടക്കം ചിത്രത്തിന് വൻവരവേൽപാണ് ആരാധകർ നൽകുന്നത്.
ചിത്രത്തിന്‍റെ പുതിയ പോസ്റ്ററും ആരാധകർ ഏറ്റെടുത്തു കഴിഞ്ഞു. വർഷങ്ങൾക്കിപ്പുറവും സേതുരാമയ്യരുടെ നടപ്പും ഭാവവും അതുപോലെ പകർത്തിയാണ് പുതിയ ചിത്രം പുറത്തുവന്നിരിക്കുന്നത്. പോസ്റ്ററിലെ ചിത്രം സമൂഹമാധ്യമങ്ങളിൽ പങ്കുവച്ചിരിക്കുകയാണ് മമ്മൂട്ടി.
എസ്.എൻ സ്വാമിയുടെ തിരക്കഥയിൽ കെ.മധു തന്നെയാണ് അഞ്ചാം ഭാഗവും സംവിധാനം ചെയ്യുന്നത്. സർഗചിത്ര അപ്പച്ചനാണ് നിർമാണം. നിരവധി ഹിറ്റ് ചിത്രങ്ങൾ സമ്മാനിച്ചിട്ടുള്ള സ്വര്‍ഗചിത്ര സിബിഐ 5ലൂടെ മികച്ച തിരിച്ചുവരവിനാണ് ലക്ഷ്യമിടുന്നത്.