നടിമാർ 30 വയസിന് ശേഷം വിവാഹം കഴിക്കുന്നതാണ് ബോളിവുഡിലെ പതിവ് രീതി. എന്നാല്‍ ആ പതിവ് തെറ്റിച്ച നടിയാണ് അനുഷ്ക ശർമ്മ. തന്‍റെ 29ാം വയസിലാണ് അനുഷ്ക വിരാട് കോലിയുടെ വധുവായത്. സിനിമയിലെ പതിവ് രീതിയില്‍ നിന്നും വ്യത്യസ്തമായി എന്ത് കൊണ്ട് 30 വയസിന് മുമ്പ് വിവാഹിതയായി എന്ന് വെളിപ്പെടുത്തിയിരിക്കുകയാണ് ഇപ്പോൾ അനുഷ്ക ശർമ്മ. ഒരു മാധ്യമത്തിന് നല്‍കിയ അഭിമുഖത്തിലാണ് താരം മനസ് തുറന്നത്.
'അഭിനേതാക്കളെ സ്‌ക്രീനില്‍ കാണാനാണ് പ്രേക്ഷകർ താല്‍പര്യപ്പെടുന്നത്. നിങ്ങളുടെ വ്യക്തി ജീവിതത്തെക്കുറിച്ചോ, നിങ്ങള്‍ വിവാഹിതയാണോയെന്നോ അല്ലെങ്കില്‍ നിങ്ങള്‍ ഒരു അമ്മയാണോയെന്നോ ഒന്നും അവര്‍ക്ക് വിഷയമല്ല. എന്‍റെ 29ാമത്തെ വയസിലാണ് ഞാന്‍ വിവാഹം കഴിച്ചത്. ഒരു നടിയെ സംബന്ധിച്ചിടത്തോളം അത് താരതമ്യേന കുറഞ്ഞ പ്രായമാണ്. ഞാന്‍ പ്രണയത്തിലായിരുന്നു. ഇപ്പോഴും അങ്ങനെ തന്നെയാണ്. അതുകൊണ്ടാണ് ഞാന്‍ നേരത്തെ വിവാഹിതയായത്' അനുഷ്ക പറയുന്നു