ഇത് പണം സമ്പാദിക്കാനുള്ള സമയം: ഫൈസിന്‍റെ കവിതയിൽ ഷൂജിത് സിര്‍കാരിന്‍റെ പ്രതികരണം

1979ൽ രചിക്കപ്പെട്ട ഹം ദേഖേംഗേ കവിത ഹിന്ദു സമുദായത്തിനെതിരല്ലെന്ന് കവിയും ഗാനരചയിതാവും തിരക്കഥാകൃത്തുമായ ജാവേദ് അക്തറും വ്യക്തമാക്കിയിരുന്നു.

മുംബൈ: പാകിസ്ഥാനി കവി ഫൈസ് അഹമ്മദ് ഫൈസിന്‍റെ കവിത ഹം ദേഖേംഗേ ഹിന്ദു മതത്തിന് വിരുദ്ധമാണെന്നുള്ള വിവാദത്തിൽ പ്രതികരണവുമായി സംവിധായകൻ ഷൂജിത് സിര്‍കാർ. "വിപ്ലവകവി ഫൈസിലിൽ ഭൂരിഭാഗം ജനങ്ങളും മുഴുകിയിരിക്കുന്നതിനാൽ, ചെറുതും വലുതുമായ ബിസിനസ്സുകൾക്ക് ഇത് പണം സമ്പാദിക്കാനുള്ള മികച്ച സമയം," എന്നാണ് 'പികു' സംവിധായകൻ ഷൂജിത് സിര്‍കാർ ട്വീറ്റ് ചെയതത്.

കഴിഞ്ഞ മാസം 17ന് കാണ്‍പൂര്‍ ഐഐടിയിൽ പൗരത്വ ഭേദഗതി നിയമത്തിനെതിരെ ജാമിയ മിലിയ വിദ്യാർഥികൾക്കൊപ്പം ഐക്യദാർഢ്യം പ്രഖ്യാപിച്ച് നടന്ന പ്രതിഷേധത്തിൽ ഫൈസിന്‍റെ കവിത ആലപിച്ചിരുന്നു. ഇത് ഹിന്ദു വികാരത്തെ വ്രണപ്പെടുത്തുന്നുവെന്നും മതത്തിന് വിരുദ്ധമാണെന്നുമുള്ള വിവാദങ്ങൾ ഉയർന്നതോടെ ഈ വിഷയം ചർച്ച ചെയ്യുന്നതിനായി കാണ്‍പൂര്‍ ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജി (ഐഐടി) ഒരു പാനൽ രൂപീകരിച്ചു. 1979ൽ രചിക്കപ്പെട്ട ഹം ദേഖേംഗേ കവിത ഹിന്ദു സമുദായത്തിനെതിരല്ലെന്ന് കവിയും ഗാനരചയിതാവും തിരക്കഥാകൃത്തുമായ ജാവേദ് അക്തറും വ്യക്തമാക്കിയിരുന്നു.