പായൽ റോഹത്ഗിയുടെ മണ്ടത്തരം പറയാനുള്ള അഭിപ്രായസ്വാതന്ത്ര്യം മാനിക്കണമെന്ന് ശശി തരൂർ എംപി

സോണിയ ഗാന്ധിയും പ്രിയങ്ക ഗാന്ധിയും ഉൾപ്പെടെ നെഹ്റു–ഇന്ദിര കുടുംബാംഗങ്ങളെ അപമാനിക്കുന്ന തരത്തിൽ വിഡിയോ നിർമിച്ചതായിരുന്നു പായലിനെതിരെയുള്ള കേസ്.

നെഹ്റു കുടുംബത്തെ അപകീർത്തിപ്പെടുത്തുന്ന വീഡിയോ ഉണ്ടാക്കി സമൂഹമാധ്യമങ്ങളിലൂടെ പ്രചരിപ്പിച്ച കേസിൽ അറസ്റ്റിലായ ബോളിവുഡ് നടി പായൽ റോഹത്ഗിയെ മോചിപ്പിക്കണമെന്ന് ശശി തരൂർ എംപി. പായലിനെ പരിഹസിച്ച കോൺഗ്രസ് എംപി അവർക്ക് മണ്ടത്തരം പറയാനുള്ള അഭിപ്രായസ്വാതന്ത്ര്യം നൽകണമെന്ന് ട്വീറ്റ് ചെയ്‌തു. സമൂഹമാധ്യമങ്ങളിലൂടെയുള്ള പായലിന്‍റെ പ്രചരണം തെറ്റാണെന്നും തികച്ചും അടിസ്ഥാനശൂന്യമാണെന്നും അദ്ദേഹം പറഞ്ഞു. "അവരെ കസ്റ്റഡിയിലെടുത്തത് അനാവശ്യമാണ്. മണ്ടത്തരം പറയാൻ അനുവദിച്ചുകൊണ്ട് അവരുടെ അഭിപ്രായസ്വാതന്ത്ര്യം മാനിക്കണം. അതിനാൽ തന്നെ നടിയെ മോചിപ്പിക്കണം," ശശി തരൂർ കുറിച്ചു.

മുന്‍ പ്രധാനമന്ത്രി ജവഹര്‍ലാല്‍ നെഹ്റു, ഇന്ദിരാ ഗാന്ധി എന്നിവരെ സംബന്ധിച്ച് ആക്ഷേപകരമായ വീഡിയോ പോസ്റ്റ് ചെയ്തതിനായിരുന്നു താരത്തെ കസ്റ്റഡിയിലെടുത്തത്. യൂത്ത് കോൺഗ്രസ് ജനറൽ സെക്രട്ടറി ചർമേഷ് ശർമയുടെ പരാതിയിലാണ് നടിയെ ഇന്നലെ അറസ്റ്റ് ചെയ്‌തത്. ഗൂഗിളില്‍ നിന്നും കണ്ടെത്തിയ വിവരങ്ങളുപയോഗിച്ചാണ് വീഡിയോ തയ്യാറാക്കിയിരിക്കുന്നതെന്നും അഭിപ്രായസ്വാതന്ത്ര്യം ഒരു തമാശയായി മാറിയിരിക്കുന്നുവെന്നും കസ്റ്റഡിയിലെടുത്തതിൽ പ്രതിഷേധിച്ച് പിന്നീട് പായൽ ട്വീറ്റ് ചെയ്തിരുന്നു.