തമിഴ് വംശജരെ തെറ്റായി ചിത്രീകരിച്ചിരിക്കുന്നുവെന്ന് ആരോപിച്ച് ദി ഫാമിലി മാൻ സീസൺ 2വിനെതിരെ വീണ്ടും പ്രതിഷേധം. സീരീസ് നിരോധിക്കണമെന്നും ആമസോൺ പ്രൈം ബഹിഷ്കരിക്കണമെന്നും ആവശ്യപ്പെട്ടുകൊണ്ടുള്ള ഹാഷ്‌ടാഗുകളോടെയാണ് ട്വിറ്ററിൽ വീണ്ടും പ്രതിഷേധങ്ങളും വിമർശനങ്ങളും സ്ഥാനം പിടിക്കുന്നത്. തമിഴർക്കെതിരെ ഫാമിലി മാൻ 2 എന്ന ഹാഷ്‌ടാഗുകളും ട്രെൻഡിങ്ങിലുണ്ട്.
ഈഴം വംശജരും തമിഴ് പുലികളും യുദ്ധപ്രേമികളാണെന്ന രീതിയിലാണ് ഫാമിലിമാൻ 2വിൽ അവതരിപ്പിക്കുന്നത്. യഥാർഥത്തിൽ അവർ ആവശ്യപ്പെട്ടിട്ടുള്ളത് സമാധാനമായിരുന്നു. അതിനായി പലപ്പോഴും എൽടിടിഇ വെടിനിർത്തൽ പോലും ഉപാധികളായി മുന്നോട്ട് വച്ചിരുന്നു. തമിഴ് പുലികൾ തീവ്രവാദികൾ ആയിരുന്നില്ലെന്നും സ്വന്തം നാടിന് വേണ്ടി ത്യാഗം ചെയ്‌ത് പോരാടിയ രക്ഷകരാണെന്നും പ്രതിഷേധ ട്വീറ്റുകൾ പറയുന്നു.