കൊവിഡ് വ്യാപനം ഉയരുന്നതിനൊപ്പം ഗുരുതരമല്ലാത്ത രോഗികളില്‍ പലരും വീട്ടില്‍ തന്നെയാണ് നിരീക്ഷണത്തില്‍ കഴിയുന്നത്. ആരോഗ്യ പ്രവര്‍ത്തകര്‍ നല്‍കുന്ന നിര്‍ദേശ പ്രകാരം ശ്വാസതടസം നേരിടുന്നവര്‍ വീട്ടില്‍ പള്‍സ് ഓക്‌സി മീറ്ററും ഉപയോഗിക്കേണ്ടതുണ്ട്. രക്തത്തിലെ ഓക്‌സിജന്‍റെ അളവ് മനസിലാക്കാനാണ് ഓക്‌സി മീറ്റര്‍ ഉപയോഗിക്കുന്നത്. ഇപ്പോള്‍ കൃത്യമായി എങ്ങനെ ഓക്‌സി മീറ്റര്‍ ഉപയോഗിക്കാമെന്ന് ചെറിയ ടൂടോറിയല്‍ വീഡിയോയിലൂടെ പറഞ്ഞ് തന്നിരിക്കുകയാണ് നടി പൂജ ഹെഗ്ഡെ. കൊവിഡിനെ നേരിട്ട തന്‍റെ സ്വന്തം അനുഭവം പങ്കുവെച്ചാണ് നടി ഇക്കാര്യം ആരാധകര്‍ക്കായി വിവരിച്ചത്. കൊവിഡ് സ്ഥിരീകരിച്ചതിനുശേഷം ഡോക്ടര്‍ ഇതേക്കുറിച്ച്‌ പറഞ്ഞുതരുന്നതുവരെ തനിക്കും പള്‍സ് ഓക്‌സിമീറ്ററിന്‍റെ ഉപയോഗം അറിയില്ലായിരുന്നെന്നും പൂജ പറയുന്നു.
ഓക്‌സിമീറ്റര്‍ ഉപയോഗിക്കും മുമ്പ് നെയില്‍ പോളിഷ് പൂര്‍ണമായും നീക്കിക്കളയുകയാണ് ആദ്യം ചെയ്യേണ്ടത്. പള്‍സ് ഓക്‌സിമീറ്റര്‍ ഉപയോഗിക്കുന്നതിന് അഞ്ച് മിനിറ്റ് മുമ്പ് വിശ്രമിക്കണം. ചൂണ്ടുവിരലോ നടുവിരലോ ഘടിപ്പിച്ചശേഷം നെഞ്ചോട് ചേര്‍ത്ത് ഒരു മിനിറ്റോളം വെച്ച്‌ ഓക്‌സിജന്‍ ലെവല്‍ പരിശോധിക്കണം. കൂടാതെ ഓക്‌സിജന്‍ പരിശോധിക്കുന്നതിന്‍റെ ഓരോ ഘട്ടവും പൂജ വീഡിയോയില്‍ കാണിച്ചുതരുന്നുമുണ്ട്.