വിവാഹത്തിനൊരുങ്ങി വിക്കി കൗശലും കത്രീന കൈഫും ; ചടങ്ങുകൾ അടുത്തയാഴ്‌ച രാജസ്ഥാനിൽ

Katrina Kaif - Vicky Kaushal marriage : ഡിസംബർ 7 മുതൽ 9 വരെ രാജസ്ഥാനിൽ നടക്കുന്ന ചടങ്ങിൽ 38കാരിയായ കത്രീനയും 33കാരനായ വിക്കി കൗശലും വിവാഹിതരാകും

മുംബൈ : ബോളിവുഡിലെ ഇന്നത്തെ ഏറ്റവും ചൂടേറിയ ചർച്ചാവിഷയം വിക്കി കൗശലിന്‍റെയും കത്രീന കൈഫിന്‍റെയും വിവാഹമാണ്. ഇരുവരും ഒരു വർഷത്തോളമായി പ്രണയത്തിലാണെന്ന് വാർത്തകൾ ഉണ്ടായിരുന്നെങ്കിലും പരസ്യമായി പ്രതികരിക്കാൻ താരങ്ങൾ തയ്യാറായിരുന്നില്ല.

എന്നാൽ ഡിസംബർ 7 മുതൽ 9 വരെ രാജസ്ഥാനിൽ നടക്കുന്ന ചടങ്ങിൽ 38കാരിയായ കത്രീനയും 33കാരനായ വിക്കി കൗശലും വിവാഹിതരാകുമെന്ന് ബോളിവുഡ് വൃത്തങ്ങൾ പറയുന്നു. ഏറ്റവും അടുത്ത ബന്ധുക്കളും സുഹൃത്തുക്കളും മാത്രമായിരിക്കും പങ്കെടുക്കുക.

സിനിമ താരങ്ങൾക്കായി വിവാഹം കഴിഞ്ഞയുടൻ ഇരുവരും ആഘോഷങ്ങൾ സംഘടിപ്പിക്കുമെന്നും വിവരമുണ്ട്. സവായ് മധോപൂരിലെ ചൗത് കാ ബർവാര ടൗണിലെ സിക്‌സ് സെൻസ് ഫോർട്ടിലാണ് വിവാഹമെന്നാണ് റിപ്പോർട്ടുകൾ.

ഇരുവരുടെയും വിവാഹത്തോടനുബന്ധിച്ച് സവായ് മധോപൂർ ജില്ലയിൽ നാല് ദിവസത്തെ ക്രമസമാധാന ക്രമീകരണങ്ങൾ ചർച്ച ചെയ്യാൻ ജില്ല ഭരണകൂട ഉദ്യോഗസ്ഥരുടെ യോഗം സംഘടിപ്പിച്ചതായി ജില്ല കലക്‌ടർ രാജേന്ദ്ര കിഷൻ അറിയിച്ചു.

കൊവിഡ് സാഹചര്യം പരിഗണിച്ച് വിവാഹത്തിന് എത്തുന്ന അതിഥികൾ രണ്ട് ഡോസ് കൊവിഡ് വാക്‌സിൻ എടുക്കണമെന്നും കലക്‌ടർ നിർദേശിച്ചിട്ടുണ്ട്. വിവാഹത്തിന് 120 അതിഥികളെയാണ് പ്രതീക്ഷിക്കുന്നത്. വാക്‌സിൻ സ്വീകരിച്ചിട്ടില്ലാത്തവർക്ക് ആർടിപിസിആർ നെഗറ്റീവ് സർട്ടിഫിക്കറ്റ് നിർബന്ധമാണ്.