അപരനോ ഒറിജനിലോ... സത്യമറിയാൻ അഭിഷേക് ബച്ചനെ വിളിച്ചു. ബിഗ് ബിയോട് രൂപസാദൃശ്യമുള്ള ശശികാന്ത് പെധ്വാളിന്‍റെ വീഡിയോ കണ്ട് ഞെട്ടിയ അനുഭവമാണ് സംവിധായകൻ പ്രിയദർശൻ പങ്കുവച്ചത്. അമിതാഭ് ബച്ചന്‍റെ അപരനായ പൂനെ സ്വദേശി ശശികാന്ത് പെധ്വാളിന്‍റെ വീഡിയോ അവിശ്വസനീയമെന്നാണ് പ്രിയദർശൻ പറയുന്നത്.
ലോക്ക് ഡൗൺ സമയം അമിതാഭ് ബച്ചൻ സ്റ്റൈലിൽ സൂപ്പർതാരത്തിന്‍റെ പാട്ടുകളും ഡയലോഗുകളും അനുകരിച്ച് സമൂഹമാധ്യമങ്ങളുടെ ശ്രദ്ധ പിടിച്ചുപറ്റുകയാണ് ശശികാന്ത്. ശശികാന്തിന്‍റെ വീഡിയോ കണ്ട ശേഷം, ബിഗ് ബിയുടെ മകൻ അഭിഷേക് ബച്ചനോട് സത്യമാണോ എന്ന് ചോദിച്ചപ്പോൾ സത്യം എന്നാണ് അദ്ദേഹം മറുപടി നൽകിയതെന്നും പ്രിയദർശൻ പറഞ്ഞു.