ദില്‍ജിത് വേഴ്‌സസ് കങ്കണ; ട്വിറ്ററിൽ കൂടുതൽ ഫോളോവേഴ്‌സുമായി ദിൽജിത് ദൊസഞ്ജ്

കർഷകപ്രതിഷേധത്തിൽ പങ്കെടുത്ത ഒരു മുതിർന്ന സിഖ് വനിത ബിൽക്കിസ് ബാനുവാണെന്ന് കങ്കണ ട്വീറ്റ് ചെയ്‌തു. എന്നാൽ, താരത്തിന്‍റെ വാർത്ത തെറ്റാണെന്നും കർഷകരെ പ്രതിനിധീകരിച്ച് എത്തിയ വനിത ഞങ്ങളുടെ ഹൃദയത്തിലുള്ളവരാണെന്നും ദിൽജിത് പ്രതികരിച്ചിരുന്നു. ഇതേ തുടർന്നാണ്, ദില്‍ജിത് വേഴ്‌സസ് കങ്കണ പോരാട്ടം സമൂഹമാധ്യമങ്ങളിൽ ഉടലെടുക്കുന്നത്.

മുംബൈ:കർഷകപ്രതിഷേധത്തിലെ കങ്കണാ റണൗട്ടിന്‍റെ ട്വീറ്റിനെതിരെ ശക്തമായി പ്രതികരിച്ചതോടെ ട്വിറ്ററിൽ അഞ്ച് ലക്ഷം ഫോളോവേഴ്‌സിനെ നേടി ദിൽജിത് ദൊസഞ്ജ്.

ഡിസംബർ രണ്ടിന് കർഷകസമരത്തിന്‍റെ പശ്ചാത്തലത്തിൽ ബിൽക്കിസ് ബാനുവിനെതിരെ കങ്കണ നടത്തിയ പ്രസ്താവന വലിയ ചർച്ചയായിരുന്നു. കർഷകരുടെ പ്രക്ഷോഭത്തിൽ പങ്കെടുത്ത ഒരു മുതിർന്ന സിഖ് വനിത ഷഹീൻബാഗ് സമരനായിക ബിൽക്കിസ് ബാനുവാണെന്നും അവരെ നൂറു രൂപയ്ക്ക് ലഭിക്കുമെന്നും കങ്കണ പറഞ്ഞു. എന്നാൽ, കങ്കണയുടെ പ്രസ്‌താവന തെറ്റാണെന്ന് പീന്നീട് സമൂഹമാധ്യമങ്ങൾ തന്നെ തെളിയിച്ചു. ഞങ്ങളുടെ ഹൃദയത്തിലുള്ള, രാജ്യത്തിന് വേണ്ടി പലതും ത്യജിച്ച അമ്മമാരെയാണ് കങ്കണാ റണൗട്ട് അധിക്ഷേപിച്ചതെന്ന് ചൂണ്ടിക്കാട്ടി പഞ്ചാബി ഗായകനും നടനുമായ ദിൽജിത്തും രംഗത്തെത്തി. തുടർന്ന്, ട്വിറ്ററിൽ ദില്‍ജിത് വേഴ്‌സസ് കങ്കണ ഹാഷ്‌ടാഗ് തരംഗമാവുകയും ചെയ്‌തു.

ട്വിറ്ററിൽ അഞ്ച് ലക്ഷം ഫോളോവേഴ്‌സിനെ സ്വന്തമാക്കി ദിൽജിത് ദൊസഞ്ജ്

എപ്പോഴും പൊട്ടത്തരം മാത്രം വിളമ്പുന്ന താരം, ആദ്യം ഇവരെ ബഹുമാനിച്ച ശേഷം രാജ്യസ്‌നേഹത്തെ കുറിച്ച് പറഞ്ഞാൽ മതിയെന്ന് ദിൽജിത് അഭിപ്രായപ്പെട്ടതോടെ, ദിൽജിത്തിനെ കരൺ ജോഹറിന്‍റെ വാത്സല്യഭാജനം എന്ന് വിശേഷിപ്പിച്ച് നടി തിരിച്ചും മറുപടി നൽകി.

കങ്കണക്കെതിരെയുള്ള ദിൽജിത്തിന്‍റെ പോരാട്ടത്തിന് ഗായകൻ മിൽക്കാ സിംഗ് ഉൾപ്പടെയുള്ളവർ പിന്തുണ അറിയിച്ചു. ഒപ്പം, സമൂഹമാധ്യമങ്ങളും കർഷകസമരത്തിലെ പഞ്ചാബി ഗായകന്‍റെ നിലപാടിനെ അനുകൂലിച്ച് രംഗത്തെത്തി. കഴിഞ്ഞ ബുധനാഴ്‌ച വരെ 3.8 മില്യൺ ഫോളോവേഴ്‌സുണ്ടായിരുന്ന ദിൽജിത്തിന്‍റെ ട്വിറ്റർ അക്കൗണ്ടിന് രണ്ട് ദിവസത്തിനകം അഞ്ച് ലക്ഷം പേരാണുള്ളത്.