ശ്രീശാന്ത് നായകനാകുന്ന ബോളിവുഡ് ചിത്രം 'പട്ടാ' ഒരുങ്ങുന്നു

ആക്ഷനും സംഗീതത്തിനും പ്രാധാന്യം നൽകി ഒരുക്കുന്ന പൊളിറ്റിക്കൽ ത്രില്ലർ ചിത്രം പട്ടായിൽ ശ്രീശാന്ത് നായകനാകുന്നുവെന്നാണ് റിപ്പോർട്ടുകൾ.

മലയാളിയായ ഇന്ത്യൻ ക്രിക്കറ്റ് താരം ശ്രീശാന്ത് നായകനാകുന്ന ബോളിവുഡ് ചിത്രമാണ് പട്ടാ. തെന്നിന്ത്യൻ സംവിധായകൻ ആർ രാധാകൃഷ്ണൻ സംവിധാനം ചെയ്യുന്ന ചിത്രം ഷൂട്ടിങ്ങിനൊരുങ്ങുന്നു. ആക്ഷനും സംഗീതത്തിനും പ്രാധാന്യം നൽകി പൊളിറ്റിക്കൽ ത്രില്ലറായി ഒരുക്കുന്ന പട്ടായിൽ ശ്രീശാന്ത് സിബിഐ ഓഫിസറുടെ കഥാപാത്രമാണ് അവതരിപ്പിക്കുന്നത്.

കൊവിഡ് നിയന്ത്രണങ്ങൾ പിൻവലിച്ചാൽ ഉടൻ തന്നെ സിനിമയുടെ ചിത്രീകരണത്തിലേക്ക് കടക്കാനാണ് അണിയറപ്രവർത്തകരുടെ തീരുമാനം. ശ്രീശാന്തിനൊപ്പം ബോളിവുഡിലെ നിരവധി പ്രമുഖ താരങ്ങളും പട്ടായിൽ അണിനിരക്കുമെന്നും റിപ്പോർട്ടുകളുണ്ട്.

തെന്നിന്ത്യക്കും മലയാളത്തിനും പ്രിയപ്പെട്ട സംഗീതജ്ഞൻ സുരേഷ് പീറ്റേഴ്‌സാണ് ചിത്രത്തിന് സംഗീതം ഒരുക്കുന്നത്. പ്രകാശ്‌കുട്ടി ഛായാഗ്രഹണം നിർവഹിക്കുന്ന ഹിന്ദി ചിത്രത്തിന്‍റെ എഡിറ്റർ സുരേഷ് യുആർഎസും കോറിയോഗ്രാഫർ ശ്രീധറുമാണ്. എൻഎൻജി ഫിലിംസിന്‍റെ ബാനറിൽ നിരുപ് ഗുപ്തയാണ് പട്ടാ നിർമിക്കുന്നത്.

ഇതാദ്യമായല്ല ശ്രീശാന്ത് വെള്ളിത്തിരയുടെ ഭാഗമാകുന്നത്. നിക്കി ഗൽറാണിക്കൊപ്പം ടീം ഫൈവ് എന്ന ചിത്രത്തിലെ നായകനായി താരം സിനിമയിൽ സാന്നിധ്യമറിയിച്ചിട്ടുണ്ട്.