പൗരത്വ ഭേദഗതി നിയമത്തിലെ ട്വീറ്റ്; ഫർഹാൻ അക്തറിനെതിരെ കേസ്

പൗരത്വ ഭേദഗതി നിയമത്തിലെ വസ്‌തുതകൾ വളച്ചൊടിച്ചൊടിക്കുന്ന രീതിയിൽ ട്വീറ്റ് ചെയ്‌തെന്ന പേരിൽ ഹിന്ദു സംഘടനാ സ്ഥാപകൻ കരുണ സാഗറാണ് പരാതി നൽകിയത്.

ബോളിവുഡ് നടനും ചലച്ചിത്ര നിർമാതാവുമായ ഫർഹാൻ അക്തറിനെതിരെ ഹിന്ദു സംഘടനാ സ്ഥാപകൻ കരുണ സാഗര്‍ പരാതി നൽകി. പൗരത്വ ഭേദഗതി നിയമത്തിലെ വസ്‌തുതകൾ വളച്ചൊടിച്ചൊടിക്കുന്ന രീതിയിൽ ട്വീറ്റ് ചെയ്‌തെന്ന പേരിലാണ് പരാതി നൽകിയത്. താരത്തിന്‍റെ ട്വീറ്റ് മുസ്ലിങ്ങളെയും ട്രാൻസ്‌ജെന്‍ററെയും നിരീശ്വരവാദികളെയും ഭയപ്പെടുത്തുന്നുവെന്നാണ് കരുണ സാഗര്‍ സൈദാബാദ് പൊലീസിന് നൽകിയ പരാതിയിൽ പറയുന്നത്.

എന്തുകൊണ്ടാണ് പൗരത്വ ഭേദഗതി നിയമത്തിനെതിരെ നമ്മൾ പ്രതിഷേധിക്കുന്നതെന്ന് കുറിച്ചുകൊണ്ട് ഫർഹാൻ അക്തർ പങ്കുവെച്ച പോസ്റ്റിൽ മുസ്ലിങ്ങൾ, ട്രാൻസ്‌ജെന്‍റേഴ്‌സ്, നിരീശ്വരവാദികൾ, ദളിതർ, ആദിവാസികൾ, ഭൂരഹിതർ, സ്‌ത്രീകൾ, രേഖകളില്ലാത്തവർ എന്നിവർ മനുഷ്യത്വരഹിതമായി പുറത്താക്കപ്പെടുമെന്ന് പറയുന്നതായി കരുണ സാഗർ ആരോപിക്കുന്നു. കൂടാതെ, ഇവരെ ജയിലിലടക്കുമെന്നും ക്യാമ്പുകളിൽ പാർപ്പിച്ചേക്കുമെന്നും താരം ട്വീറ്റിലൂടെ പറയുന്നുണ്ട്. ഇത് ആളുകളെ പരിഭ്രാന്തരാക്കുമെന്നുള്ളതിനാലാണ് താരത്തിനെതിരെ കേസ് നൽകിയിരിക്കുന്നത്.