ലക്ഷ്‌മി ബോംബ് ബഹിഷ്‌കരിക്കാന്‍ സോഷ്യല്‍മീഡിയയില്‍ ക്യാമ്പയിന്‍
'ബോയ്‌കോട്ട് ലക്ഷ്‌മി ബോംബ്', 'ഷെയിം ഓണ്‍ യു അക്ഷയ്‌കുമാര്‍' എന്നീ ഹാഷ്ടാഗുകളാണ് സോഷ്യല്‍ മീഡിയയില്‍ ട്രെന്‍ഡിങ്ങാകുന്നത്. രാഘവ ലോറന്‍സാണ് ലക്ഷ്‌മി ബോംബ് സംവിധാനം ചെയ്‌തിരിക്കുന്നത്
രാഘവ ലോറന്‍സ് സംവിധാനം ചെയ്ത അക്ഷയ് കുമാര്‍-കിയാര അദ്വാനി ചിത്രം ലക്ഷ്‌മി ബോംബ് ബഹിഷ്‌കരിക്കാന്‍ വ്യാപക സോഷ്യല്‍മീഡിയ ക്യാമ്പയിന്‍. 'ബോയ്‌കോട്ട് ലക്ഷ്‌മി ബോംബ്', 'ഷെയിം ഓണ്‍ യു അക്ഷയ്‌കുമാര്‍' എന്നീ ഹാഷ്ടാഗുകളാണ് സോഷ്യല്‍ മീഡിയയില്‍ ട്രെന്‍ഡിങ്ങാകുന്നത്. ഹൈന്ദവ ദൈവത്തിന്‍റെ പേരിനൊപ്പം 'ബോംബ്' എന്ന വാക്ക് ചേര്‍ത്ത് അപമാനിക്കുന്നു, ലവ് ജിഹാദിനെ പ്രോത്സാഹിപ്പിക്കുന്നു, ട്രാന്‍സ് സമൂഹത്തെ തെറ്റായ രീതിയില്‍ സിനിമയില്‍ ചിത്രീകരിച്ചു എന്നീ ആരോപണങ്ങളാണ് ചിത്രത്തിന് നേരെ ഉയരുന്നത്. ചിത്രത്തില്‍ അക്ഷയ് കുമാര്‍ അവതരിപ്പിക്കുന്ന കഥാപാത്രത്തിന്‍റെ പേര് ആസിഫ് എന്നാണ് നായിക കിയാര അദ്വാനിയുടെ പേര് പ്രിയ എന്നാണ് ഇതാണ് ചിത്രം ലവ് ജിഹാദിനെ പ്രോത്സാഹിപ്പിക്കുന്നതാണെന്ന തരത്തിലുള്ള ആരോപണത്തിന് പിന്നില്‍. സിനിമ ബഹിഷ്‌കരിക്കാനുള്ള ആഹ്വാനം വര്‍ധിച്ചതോടെ അക്ഷയ് കുമാര്‍ ആരാധകര്‍ 'വി ലവ് യു അക്ഷയ് കുമാര്‍' എന്ന ഹാഷ്ടാഗുകളുമായും രംഗത്തെത്തിയിട്ടുണ്ട്. ദിവസങ്ങള്‍ക്ക് മുമ്പ് പുറത്തിറങ്ങിയ ചിത്രത്തിന്‍റെ ട്രെയിലറിന് മികച്ച പ്രതികരണമായിരുന്നു ലഭിച്ചത്. രാഘവ ലോറന്‍സാണ് തമിഴില്‍ പുറത്തിറങ്ങിയ ചിത്രത്തിലെ നായകന്‍. കാഞ്ചന എന്ന പേരില്‍ പുറത്തിറങ്ങിയ ചിത്രം തെന്നിന്ത്യയില്‍ ഹിറ്റായിരുന്നു. ചിത്രത്തിന്‍റെ രണ്ടാംഭാഗത്തിനും മികച്ച പ്രതികരണമായിരുന്നു പ്രേക്ഷകരില്‍ നിന്നും ലഭിച്ചത്. ലക്ഷ്‌മി ബോംബിലെ അക്ഷയ് കുമാറിന്‍റെ പ്രകടനത്തെ നടന്‍ ആമിര്‍ ഖാനും അഭിനന്ദിച്ചിരുന്നു.