ബംഗാളി സംവിധായകനും കവിയുമായ ബുദ്ധദേബ് ദാസ് ഗുപ്‌ത വിടവാങ്ങി

മികച്ച ചലച്ചിത്രത്തിനുള്ള ദേശീയ പുരസ്ക്കാരം അഞ്ചു തവണ നേടിയിട്ടുണ്ട്. രണ്ട് തവണ മികച്ച സംവിധായകനായും ദേശീയ പുരസ്‌കാരത്തിനർഹനായി. സിനിമാസംവിധാനത്തിന് പുറമെ തിരക്കഥാകൃത്തായും കവിയായും പ്രശസ്‌തനായിരുന്നു.

കൊൽക്കത്ത:പ്രശസ്‌ത ബംഗാളി സംവിധായകനും, കവിയും, തിരക്കഥാകൃത്തുമായ ബുദ്ധദേബ് ദാസ് ഗുപ്‌ത അന്തരിച്ചു. 77 വയസ്സായിരുന്നു. വൃക്ക സംബന്ധമായ അസുഖങ്ങളെ തുടർന്ന് ചികിത്സയിലായിരുന്നു. സൗത്ത് കൊൽക്കത്തയിലെ തന്‍റെ വസതിയിൽ വച്ച് ഇന്ന് രാവിലെയാണ് അദ്ദേഹം അന്തരിച്ചത്.

ഇന്ത്യൻ ചലച്ചിത്രമേഖലയിൽ നിർണായക സംഭാവനകൾ നൽകിയ സംവിധായകന്‍റ അഞ്ച് ചിത്രങ്ങൾ ദേശീയ അവാർഡുകൾ നേടി. രണ്ട് തവണ മികച്ച സംവിധായകനായും ദേശീയ അവാർഡിൽ തെരഞ്ഞെടുക്കപ്പെട്ടിട്ടുണ്ട്. ബാഗ് ബഹാദൂർ (1989), ചരാചർ(1993), ലാൽ ധർജ (1997), മോണ്ടോ മേയർ ഉപഖ്യാൻ (2002), കാൽപുരുഷ് (2008) എന്നിവയാണ് മികച്ച ചിത്രങ്ങളായി ദേശീയ അവാർഡിൽ പ്രഖ്യാപിച്ച സംവിധായകന്‍റെ സംഭാവനകൾ.

1980, 1990 കാലഘട്ടങ്ങളിൽ ഗൗതം ഘോഷ്, അപർണ സെൻ എന്നിവർക്കൊപ്പം ബംഗാളിൽ നടന്ന സമാന്തര സിനിമ പ്രസ്ഥാനത്തിന് നേതൃത്വം നൽകിയ സിനിമാപ്രവർത്തകനാണ്. സ്യൂട്ട്കേസ്, ഹിംജോഗ്, കോഫിൻ കിംബ, ചാത്ത കഹിനി, റോബോട്ടർ ഗാൻ, ശ്രെഷ്ഠ കബിത, ഭോമ്പോലെർ ആശ്ചര്യ കാഹിനി ഒ അനന്യ കബിത തുടങ്ങിയ കവിതകളിലൂടെ സാഹിത്യരംഗത്തും ബുദ്ധദേബ് ദാസ് ഗുപ്‌ത നിർണായസാന്നിധ്യമായിരുന്നു.

സംവിധായകൻ രാജ് ചക്രബർത്തി, ഓസ്കർ ജേതാവ് റസൂൽ പൂക്കുട്ടി, ബംഗാൾ മുഖ്യമന്ത്രി മമത ബാനർജി തുടങ്ങിയ സിനിമാ- സാംസ്‌കാരിക- രാഷ്‌ട്രീയ മേഖലയിലെ പ്രമുഖർ സംവിധായകന്‍റെ വിയോഗത്തിൽ അനുശോചനം രേഖപ്പെടുത്തി.