ആദ്യ കണ്മണിയെ വരവേൽക്കാനൊരുങ്ങുകയാണ് ബോളിവുഡ് നടൻ അപർശക്തി ഖുറാനയും ഭാര്യ ആകൃതി അഹൂജയും. രസകരമായ വാക്കുകളിലൂടെയാണ് തങ്ങളുടെ പുതിയ സന്തോഷം നടൻ ആരാധകരുമായി പങ്കുവച്ചത്. 'ലോക്ക് ഡൗണിൽ ജോലി വിപുലീകരിക്കാൻ കഴിഞ്ഞില്ല, അതുകൊണ്ട് ഞങ്ങൾ ഞങ്ങളുടെ കുടുംബം വിപുലീകരിക്കാൻ തീരുമാനിച്ചു' എന്നാണ് ഭാര്യയുടെ നിറവയറിനെ ചുംബിക്കുന്ന ചിത്രത്തിനൊപ്പം അപർശക്തി ഖുറാന കുറിച്ചത്. 'ഗർഭ മുന്നറിയിപ്പ്' എന്ന് ഹാഷ് ടാഗ് കൂടി ചേർത്താണ് ബോളിവുഡ് താരത്തിന്‍റെ ഇൻസ്റ്റഗ്രാം പോസ്റ്റ്.
ബോളിവുഡിലെ പ്രമുഖ യുവനടൻ ആയുഷ്മാൻ ഖുറാനയുടെ അനുജനാണ് അപർശക്തി ഖുറാന. ആമിർ ഖാന്‍റെ ദംഗൽ, രാജ്കുമാർ റാവുവിനൊപ്പം സ്ത്രീ, വരുൺ ധവാൻ നായകനായ ബദ്രിനാഥ് കി ദുൽഹനിയ, കാർത്തിക് ആര്യനൊപ്പം ലുക്കാ ചുപ്പി എന്നീ ബോളിവുഡ് ചിത്രങ്ങളിലൂടെയാണ് അപർശക്തി ഖുറാന അഭിനയത്തിൽ സജീവമാകുന്നത്.