ആയുഷ്‌മാൻ ഖുറാനയുടെ സഹോദരനും നടനുമായ അപർശക്തി ഖുറാനയ്‌ക്ക് പെൺകുഞ്ഞ് ജനിച്ചു. അപർശക്തി തന്നെയാണ് കുഞ്ഞതിഥി എത്തിയ സന്തോഷവാർത്ത ഇൻസ്റ്റഗ്രാം പോസ്റ്റിലൂടെ അറിയിച്ചത്.
ഓഗസ്റ്റ് 27ന് പെൺകുഞ്ഞ് പിറന്നുവെന്നും ആദ്യ കൺമണിക്ക് അർസോയി എ. ഖുറാന എന്ന് പേരിട്ടുവെന്നും പോസ്റ്റിൽ നടൻ കുറിച്ചു.
More Read: ലോക്ക് ഡൗണിൽ കുടുംബം വിപുലീകരിക്കാമെന്ന് തീരുമാനിച്ചു: ആദ്യ കൺമണിയെ കാത്ത് അപർശക്തി ഖുറാന
തങ്ങളുടെ ജീവിതത്തിലേക്ക് പുതിയൊരാൾ കൂടി കടന്നുവരികയാണെന്ന് കഴിഞ്ഞ ജൂണിൽ അപർശക്തിയും ഭാര്യ ആകൃതി അഹൂജയും പറഞ്ഞിരുന്നു. ലോക്ക് ഡൗണിനിടയിൽ കുടുംബം വിപുലീകരിക്കാൻ തീരുമാനിച്ചു എന്ന രസകരമായ കുറിപ്പോടെയാണ് താരം ആദ്യത്തെ കൺമണിയെ കുറിച്ചുള്ള വാർത്ത പങ്കുവച്ചത്. അപർശക്തിയുടെ രസകരമായ പോസ്റ്റ് ആരാധകരും ഏറ്റെടുത്തിരുന്നു.
അപർശക്തിയുടെ കൺമണിയെ സ്വാഗതം ചെയ്‌ത് ആയുഷ്‌മാൻ ഖുറാന
ഇപ്പോൾ തങ്ങളുടെ കുടുംബത്തിലെ പുതിയ അംഗത്തെ സ്വാഗതം ചെയ്യുന്നുവെന്ന് അർസോയിയുടെ ജനനത്തിന് പിന്നാലെ ആയുഷ്‌മാൻ ഖുറാന ഇൻസ്റ്റഗ്രാമിൽ കുറിച്ചു. സഹോദരന് പുറമെ, അപർശക്തിക്കും ആകൃതിക്കും ആശംസ അറിയിച്ച് ആരാധകരും എത്തിയിട്ടുണ്ട്.
2014ലാണ് നടനും അവതാരകനുമായ അപർശക്തി ഖുറാനയും ബിസിനസ് വുമൺ ആകൃതി അഹൂജയും വിവാഹിതരാവുന്നത്. മകളുടെ ജനനം കൂടാതെ, അപർശക്തിയുടെ പുത്തൻ സിനിമ റിലീസിനെത്തുന്നുവെന്നതും താരത്തിന് ഇരട്ടി സന്തോഷമാണ്. സെപതംബർ മൂന്നിനാണ് നടന്‍റെ ഹെൽമറ്റ് എന്ന പുത്തൻ ചിത്രം സീ5ലൂടെ റിലീസിനെത്തുന്നത്.