കര്‍ഷക സമരത്തെ അനുകൂലിച്ച് സംസാരിക്കാന്‍ മടികാണിക്കുന്ന ബോളിവുഡ് താരങ്ങളോട് നടന്‍ നസറുദ്ദീന്‍ ഷാ ചോദിച്ച ചോദ്യങ്ങളാണ് ഇപ്പോള്‍ സോഷ്യല്‍മീഡിയയില്‍ വൈറലാകുന്നത്. കര്‍ഷക സമരം രണ്ട് മാസം പിന്നിടുന്ന വേളയില്‍ ഹോളിവുഡ് താരങ്ങളടക്കം കര്‍ഷകരുടെ സമരത്തെ അനുകൂലിച്ച് രംഗത്തെത്തിയിരുന്നു. പക്ഷെ അപ്പോഴും താപ്സി പന്നു, ദില്‍ജിത്ത് ഒഴികെയുള്ള താരങ്ങളെല്ലാം കര്‍ഷക സമരത്തെ പ്രതികൂലിച്ചാണ് സംസാരിച്ചത്. സച്ചിന്‍, അക്ഷയ്‌കുമാര്‍ അടക്കമുള്ള താരങ്ങള്‍ കര്‍ഷക സമരത്തിനെതിരെ നടത്തിയ ട്വീറ്റുകളും വിവാദമായിരുന്നു. എന്നാല്‍ കര്‍ഷക സമരത്തെ കുറിച്ചുള്ള തന്‍റെ നിലാപാട് വ്യക്തമാക്കിയിരിക്കുകയാണ് ബോളിവുഡിലെ മുതിര്‍ന്ന നടന്‍ നസറുദ്ദീന്‍ ഷാ.
ഏഴ് തലമുറക്ക് വേണ്ടത് സമ്പാദിച്ചില്ലേ...? അവർക്ക് വേണ്ടി ഉരിയാടിയാൽ എന്താണ് നിങ്ങൾക്ക് നഷ്ടപ്പെടുവാൻ ഉള്ളത്..? നസറുദ്ദീന്‍ ഷാ ചോദിക്കുന്നു - Farmers agitation
ഒരു മാധ്യമത്തിന് നല്‍കിയ അഭിമുഖത്തിനിടെയാണ് കര്‍ഷക സമരത്തില്‍ തന്‍റെ നിലപാടിനെ കുറിച്ചും ബോളിവുഡ് താരങ്ങള്‍ കര്‍ഷക സമരത്തെ വിമര്‍ശിച്ചതിനെതിരെയും നസറുദ്ദീന്‍ ഷാ സംസാരിച്ചത്
നസറുദ്ദീന്‍ ഷാ
'അവകാശങ്ങൾക്ക് വേണ്ടി രണ്ട് മാസത്തിലേറെയായി അസ്ഥി മരവിക്കുന്ന തണുപ്പിൽ അവർ തെരുവിൽ കിടക്കുകയാണ്. അത് എന്നെ ബാധിക്കില്ല എന്നെനിക്ക് പറയാനാവില്ല... ശത്രുക്കളുടെ ആക്രോശത്തെക്കാൾ എന്നെ അലട്ടുന്നത് മിത്രങ്ങളുടെ നിശബ്ദതയാണ്... ഏഴ് തലമുറക്ക് വേണ്ടത് സമ്പാദിച്ചില്ലേ...? എന്നിട്ടും കര്‍ഷകര്‍ക്ക് വേണ്ടി ഉരിയാടിയാൽ എന്താണ് നിങ്ങൾക്ക് നഷ്ടപ്പെടുവാൻ ഉള്ളത്...?' എന്നാണ് നസറുദ്ദീന്‍ ഷാ ഒരു മാധ്യമത്തിന് നല്‍കിയ അഭിമുഖത്തിനിടെ ചോദിച്ചത്. സിനിമാതാരങ്ങളുടെ മൗനത്തെക്കുറിച്ച് നസറുദ്ദീന്‍ ഷാ പറഞ്ഞ വക്കുകള്‍ സിനിമാ പ്രേമികള്‍ ഒന്നടങ്കം ഏറ്റെടുത്ത് കഴിഞ്ഞു.