സുരക്ഷിതമായി ഗ്രൂപ്പ് ചാറ്റുകൾ ചെയ്യാം, മേസേജസിലും എൻഡ്-ടു-എൻഡ് എൻക്രിപ്ഷൻ അവതരിപ്പിക്കാനൊരുങ്ങി ഗൂഗിൾ

ആൻഡ്രോയിഡ് ഫോണുകൾക്കായുള്ള ഗൂഗിളിന്‍റെ ഇൻസ്‌റ്റന്‍റ് മെസേജിങ് ആപ്പായ 'മെസേജസ്'ൽ എൻഡ്-ടു-എൻഡ് എൻക്രിപ്ഷൻ അവതരിപ്പിക്കാനാണ് കമ്പനിയുടെ നീക്കം.

സാൻഫ്രാൻസിസ്കോ: ടെക് ഭീമനായ ഗൂഗിളിന്‍റെ ഇൻസ്‌റ്റന്‍റ് മെസേജിങ് ആപ്പായ ' മെസേജസ്' ഇനി സുരക്ഷിതമായി ഉപയോഗിക്കാം. ഗൂഗിൾ മേസേജസിൽ എൻഡ്-ടു-എൻഡ് എൻക്രിപ്ഷൻ ഫീച്ചർ അവതരിപ്പിക്കാനൊരുങ്ങുകയാണ് കമ്പനി. ഗ്രൂപ്പ് ചാറ്റുകളിൽ ഫീച്ചർ അവതരിപ്പിക്കാനാണ് കമ്പനിയുടെ നീക്കം.

ഇതിനായുള്ള പരീക്ഷണങ്ങൾ ആരംഭിച്ചതായാണ് വിവരം. ഈ വർഷം ആദ്യം മെസേജ് ആപ്പിലെ RCS (റിച്ച് കമ്മ്യൂണിക്കേഷൻ സർവീസസ്) വഴിയുള്ള ഗ്രൂപ്പ് ചാറ്റുകളിൽ എൻഡ്-ടു-എൻഡ് എൻക്രിപ്ഷൻ ഫിച്ചർ അവതരിപ്പിക്കുമെന്ന് ഗൂഗിൾ പ്രഖ്യാപിച്ചിരുന്നു. ഗ്രൂപ്പിലെ എല്ലാ അംഗങ്ങളും ഫീച്ചർ ഓൺ ചെയ്‌താൽ മാത്രമേ എൻഡ് ടു എൻഡ് എൻക്രിപ്ഷൻ ലഭിക്കുകയുള്ളു.

വൺ ടു വൺ മെസേജുകൾക്ക് നേരത്തെ തന്നെ എൻഡ്-ടു-എൻഡ് എൻക്രിപ്ഷൻ ഫീച്ചർ അവതരിപ്പിച്ചതാണ്. എന്നാൽ ഗ്രൂപ്പ് ചാറ്റുകൾ എൻക്രിപ്റ്റ് ചെയ്‌തിരുന്നില്ല.

എൻഡ്-ടു-എൻഡ് എൻക്രിപ്ഷൻ:ഒരു ഉപയോക്താവ് അയക്കുന്ന സന്ദേശത്തിന്‍റെ ഉള്ളടക്കം മൂന്നാമത് ഒരു വ്യക്തി കാണുന്നതിൽ നിന്നും സംരക്ഷിക്കുന്ന സേവനമാണ് എൻഡ്-ടു-എൻഡ് എൻക്രിപ്ഷൻ. അതിനാൽ അയച്ചയാൾക്കും സ്വീകർത്താവിനും മാത്രമേ സന്ദേശം കാണാൻ കഴിയുകയുളളൂ. എൻഡ്-ടു-എൻഡ് എൻക്രിപ്ഷൻ സംവിധാനമുളള ഉള്ളടക്കം വീണ്ടെടുക്കാൻ മറ്റാർക്കും കഴിയില്ല.