ഹോട്ട്സ്പോട്ട് വഴി ആൻഡ്രോയ്‌ഡ് ഫോണുമായി എളുപ്പം കണക്‌ട് ചെയ്യാം; വിൻഡോസ് 11 അപ്‌ഡേഷൻ പരീക്ഷിച്ച് മൈക്രോസോഫ്റ്റ്

'ഫോൺ ലിങ്ക്' അപ്‌ഡേറ്റും പുതിയ ഫീച്ചറിലുണ്ട്. പുതിയ ഫീച്ചറിൽ വിൻഡോസ് 11ൽ പ്രവർത്തിക്കുന്ന കമ്പ്യൂട്ടറുകൾക്കും ലാപ്‌ടോപുകൾക്കും കണക്‌ട് ചെയ്‌ത സ്‌മാർട്ട് ഫോണുകൾ കണ്ടെത്താനും എവിടെയിരുന്നാലും ഇന്‍റർനെറ്റ് കണക്‌ടിവിറ്റിക്കായി ഹോട്ട്സ്‌പോട്ട് ഓൺ ചെയ്യാനും കഴിയും.

സാൻ ഫ്രാൻസിസ്കോ: വിൻഡോസ് 11 ഓപ്പറേറ്റിങ് സിസ്റ്റത്തിനായി പുതിയ പ്രിവ്യൂ ബിൽഡ് പരീക്ഷിച്ച് മൈക്രോസോഫ്റ്റ്. മൊബൈൽ ഹോട്ട്‌സ്‌പോട്ട് വഴി കമ്പ്യൂട്ടറിൽ നിന്നോ ലാപ്ടോപിൽ നിന്നോ ആൻഡ്രോയ്‌ഡ് ഫോണിലേക്ക് നേരിട്ട് കണക്‌ട് ചെയ്യാൻ ഉപയോക്താക്കളെ സഹായിക്കുന്നതാണ് പുതിയ അപ്‌ഡേറ്റ്. 'ഫോൺ ലിങ്ക്' അപ്‌ഡേറ്റും പുതിയ ഫീച്ചറിലുണ്ട്. എന്നാൽ ഫോൺ ലിങ്ക് ഫീച്ചർ ചില ആൻഡ്രോയ്‌ഡ് ഉപകരണങ്ങളിൽ മാത്രമേ പ്രവർത്തിക്കൂ.

പുതിയ ഫീച്ചറിൽ വിൻഡോസ് 11ൽ പ്രവർത്തിക്കുന്ന കമ്പ്യൂട്ടറുകൾക്കും ലാപ്‌ടോപുകൾക്കും കണക്‌ട് ചെയ്‌ത സ്‌മാർട്ട് ഫോണുകൾ കണ്ടെത്താനും എവിടെയിരുന്നാലും ഇന്‍റർനെറ്റ് കണക്‌ടിവിറ്റിക്കായി ഹോട്ട്സ്‌പോട്ട് ഓൺ ചെയ്യാനും കഴിയും. നിലവിൽ വിൻഡോസ് ഇൻസൈഡേഴ്‌സ് അംഗങ്ങളിൽ പരീക്ഷിക്കുന്ന പുതിയ അപ്‌ഡേഷൻ വരുംമാസങ്ങളിൽ പൊതുജനങ്ങളിലേക്ക് എത്തുമെന്ന് പ്രതീക്ഷിക്കുന്നു. മൈക്രോസോഫ്റ്റിന്‍റെ ഫോൺ ലിങ്ക് ആപ്പും പുതിയ ബിൽഡിൽ അപ്ഡേറ്റ് ചെയ്യപ്പെടുമെന്നാണ് പ്രതീക്ഷിക്കുന്നത്.

പുതിയ അപ്ഡേറ്റിൽ ഉപയോക്താക്കൾക്ക് വിൻഡോസ് വൈഫൈ പാനൽ ഉപയോഗിച്ച് ഫോണിന്‍റെ മൊബൈൽ ഹോട്ട്സ്‌പോട്ടിലേക്ക് വിൻഡോസ് 11 നേരിട്ട് കണക്‌ട് ചെയ്യാനാകും. ഐഫോൺ ഹോട്ട്‌സ്പോട്ടുമായി മാക് ഓപ്പറേറ്റിങ് സിസ്റ്റം എങ്ങനെ എളുപ്പത്തിൽ കണക്‌ട് ചെയ്യാം എന്നതിന് സമാനമാണ് പുതിയ ഫീച്ചർ.

എന്നാൽ പുതിയ ഫോൺ ലിങ്ക് ഫീച്ചർ വൺ യുഐ 4.1.1 ഉം അതിന് ശേഷമുള്ളതുമായ സാംസങ് മൊബൈൽ ഫോണുകളിൽ മാത്രമേ ലഭ്യമാകൂ. സർഫസ് ഡുവോ പോലുള്ള മറ്റ് ഉപകരണങ്ങളിൽ പ്രവർത്തിക്കുന്ന തരത്തിൽ ഫോൺ ലിങ്ക് പിന്നീട് മൈക്രോസോഫ്‌റ്റ് അപ്‌ഡേറ്റ് ചെയ്‌തേക്കാമെന്ന് റിപ്പോർട്ടുകൾ പറയുന്നു. അതേസമയം, വിൻഡോസ് 11 കമ്പ്യൂട്ടറുകൾക്കും ഡുവോ ഉപകരണങ്ങൾക്കും ഇടയിൽ ശക്തമായ കണക്ഷനുകൾ ലഭ്യമാക്കുന്നതിനായി മൈക്രോസോഫ്റ്റ് സർഫസ് ഡുവോ, സർഫസ് ഡുവോ 2 എന്നിവയിൽ ആൻഡ്രോയ്‌ഡ് 12 എൽ പുറത്തിറക്കാൻ തുടങ്ങിയിരുന്നു.