വാഷിങ്ടണ്‍: ചൈനീസ് കമ്പനിയായ ബൈറ്റ്ഡാന്‍സിന്‍റെ ഉടമസ്ഥതയിലുള്ള ടിക് ടോക് നിരോധിക്കാന്‍ നിയമ നിര്‍മാണവുമായി മുന്നോട്ട് പോകുമെന്ന് യുഎസ് ഹൗസ് ഓഫ് റെപ്രസന്‍റേറ്റീവ്സ് സ്‌പീക്കര്‍ കെവിന്‍ മക്കാര്‍ത്തി. ദേശീയ സുരക്ഷ ചൂണ്ടിക്കാട്ടി അമേരിക്കയില്‍ ടിക് ടോക് നിരോധിക്കണം എന്ന ആവശ്യം ഉയരുന്നതിനിടെ ആണ് കെവിന്‍ മക്കാര്‍ത്തിയുടെ പ്രഖ്യാപനം. ചൈനീസ് കമ്മ്യൂണിസ്റ്റ് പാര്‍ട്ടിയുടെ സാങ്കേതിക കൂടാരങ്ങളില്‍ നിന്ന് അമേരിക്കക്കാരെ രക്ഷിക്കാന്‍ നിയമനിര്‍മാണവുമായി യുഎസ് ഭരണകൂടം മുന്നോട്ട് പോകുമെന്ന് കെവിന്‍ മക്കാര്‍ത്തി വ്യക്തമാക്കി.
ടിക് ടോക് സിഇഒയ്‌ക്ക് സത്യസന്ധത പുലര്‍ത്താന്‍ കഴിയാത്തതിലും ചൈനീസ് സര്‍ക്കാരിന് ടിക് ടോകില്‍ ആക്‌സസ് ഉണ്ടെന്ന കാര്യത്തിലും ആശങ്കയുണ്ടെന്ന് മക്കാര്‍ത്തി ട്വിറ്ററില്‍ കുറിച്ചു. 'ടിക് ടോക് സി ഇ ഒയ്‌ക്ക് സത്യസന്ധത പുലര്‍ത്താന്‍ സാധിക്കാത്തതും ടിക് ടോക്ക് ഉപയോക്തൃ ഡാറ്റയിലേക്ക് ചൈനയ്ക്ക് ആക്‌സസ് ഉണ്ട് എന്നതടക്കം ഞങ്ങള്‍ക്ക് അറിയുന്ന കാര്യങ്ങള്‍ ശരിയാണെന്ന് സമ്മതിക്കാന്‍ കഴിയാത്തതും വളരെ ആശങ്കാജനകമാണ്. ചൈനീസ് കമ്മ്യൂണിസ്റ്റ് പാര്‍ട്ടിയുടെ സാങ്കേതിക കൂടാരങ്ങളില്‍ നിന്ന് അമേരിക്കക്കാരെ സംരക്ഷിക്കാന്‍ നിയമ നിര്‍മാണവുമായി സഭ മുന്നോട്ട് പോകും', മക്കാര്‍ത്തി ട്വീറ്റ് ചെയ്‌തു.
അതേസമയം വർധിച്ചുവരുന്ന സുരക്ഷ ആശങ്കകൾക്കും കമ്പനിയുടെ മേൽ ചൈനീസ് സർക്കാരിന് സ്വാധീനം ഉണ്ടെന്ന അഭ്യൂഹങ്ങള്‍ക്കിടയിലും ടിക് ടോക്ക് സി ഇ ഒ ഷൗ സി ച്യൂ യുഎസ് കോൺഗ്രസിന് മുമ്പാകെ ഹാജരായിരുന്നു. യുഎസ് ഹൗസ് എനർജി ആന്‍റ് കൊമേഴ്‌സ് കമ്മിറ്റി ടിക് ടോക് സിഇഒയെ ചോദ്യം ചെയ്യുകയുണ്ടായി. ചോദ്യം ചെയ്യുന്ന വേളയില്‍ യുഎസ് നിയമനിർമാതാവ് ഡെബി ലെസ്‌കോ ഇന്ത്യ അടക്കമുള്ള രാജ്യങ്ങളിലെ ടിക് ടോക് നിരോധനത്തെ കുറിച്ച് പ്രതിപാതിച്ചു.