എഞ്ചിനിലെ കാന്തം ചൈനയിൽ നിന്ന് ; എഫ് 35 ജെറ്റുകൾ സ്വീകരിക്കുന്നത് നിർത്തലാക്കി യുഎസ്

എഫ്35ന്‍റെ ടർബോമാഷൈൻ പമ്പുകളിലെ കാന്തങ്ങളിൽ ഉപയോഗിക്കുന്ന അലോയ് ചൈനയിൽ ഉത്പാദിപ്പിച്ചതാണെന്നാണ് കണ്ടെത്തിയത്

വാഷിങ്ടൺ: എഞ്ചിനിൽ ഉപയോഗിക്കുന്ന കാന്തം ചൈനയിൽ നിന്നുള്ള അനധികൃത വസ്തുക്കൾ ഉപയോഗിച്ചാണ് നിർമിച്ചതെന്ന് കണ്ടെത്തിയതിനെത്തുടർന്ന് പുതിയ എഫ് 35 വിമാനങ്ങൾ സ്വീകരിക്കുന്നത് നിർത്തലാക്കി യുസ് പെന്‍റഗണ്‍. വിമാനത്തിന്‍റെ നിർമാതാക്കളായ ലോക്ക്ഹീഡ് മാർട്ടിൻ ജെറ്റിന്‍റെ എഞ്ചിനിൽ ഉപയോഗിച്ചിരിക്കുന്ന ഭാഗം ചൈനയിൽ നിർമിച്ചതാണെന്ന് കണ്ടെത്തിയതായി പ്രതിരോധ വകുപ്പ് അറിയിച്ചു.

എഫ്-35ന്‍റെ ടർബോമാഷൈൻ പമ്പുകളിലെ കാന്തങ്ങളിൽ ഉപയോഗിക്കുന്ന അലോയ് ചൈനയിൽ ഉത്പാദിപ്പിച്ചതാണെന്ന് ഡിഫൻസ് കോൺട്രാക്‌ട് മാനേജ്‌മെന്‍റ് ഏജൻസി ഓഗസ്റ്റ് 19-ന് എഫ്-35 ജോയിന്‍റ് പ്രോഗ്രാം ഓഫിസിനെ അറിയിച്ചതായി വക്താവ് റസ്സൽ ഗോമെയർ വ്യക്‌തമാക്കി. അതിനാൽ ഭാവിയിലെ ടർബോ മെഷീനുകളിൽ അലോയ്‌ക്ക് ബദൽ സ്രോതസ് ഉപയോഗിക്കുമെന്ന് പെന്‍റഗണും ലോക്ക്ഹീഡും പറഞ്ഞു.

ലോക്ക്ഹീഡ് മാർട്ടിനാണ് വിമാനം നിർമിക്കുന്നതെങ്കിലും ഹണിവെല്ലാണ് ടർബോമാഷൈൻ നിർമ്മിക്കുന്നത്. ഓഗസ്റ്റ് അവസാനത്തോടെയാണ് ടർബോമാഷൈൻ നിർമിക്കുന്നതിനായുള്ള ഉപകരണങ്ങൾ വിതരണം ചെയ്യുന്ന മൂന്നാം നിര വിതരണക്കാർ തങ്ങൾ ചൈനയിൽ നിർമിച്ച കാന്തമാണ് ഉപയോഗിക്കുന്നതെന്ന് ഹണിവെലനെ അറിയിച്ചത്.

അതേസമയം കാന്തം സെൻസിറ്റീവ് പ്രോഗ്രാം വിവരങ്ങളിലേക്കുള്ള പ്രവേശനം നൽകുന്നില്ലെന്നും നിലവിൽ ഉപയോഗിക്കുന്ന എഫ് 35 വിമാനങ്ങൾക്ക് സുരക്ഷാപ്രശ്‌നങ്ങളൊന്നും ഇല്ലെന്നും പ്രതിരോധ വകുപ്പ് പ്രസ്‌താവനയില്‍ അറിയിച്ചു. നിലവിൽ സേവനം നടത്തുന്ന അഞ്ചാം തലമുറ യുദ്ധവിമാനങ്ങളുടെ പ്രവർത്തനങ്ങളെ ഈ ഭാഗം ബാധിക്കുന്നില്ലെന്നും എഫ്-35 ജോയിന്‍റ് പ്രോഗ്രാം ഓഫിസർ സ്ഥിരീകരിച്ചു.