ഇസ്ലാമബാദ് : സുപ്രീം കോടതിക്കും ചീഫ് ജസ്റ്റിസിനും ഐക്യദാർഢ്യം പ്രഖ്യാപിച്ച് നടത്തിയ റാലിയിൽ നിന്ന് പാകിസ്ഥാൻ തെഹ്‌രീകെ ഇൻസാഫിന്‍റെ (പിടിഐ) പ്രവർത്തകരെ ഇസ്ലാമബാദ് പൊലീസ് അറസ്റ്റ് ചെയ്‌തു. തടവുകാരുടെ വാനിനൊപ്പം നിരവധി പൊലീസുകാരെ ഇസ്ലാമബാദിൽ വിന്യസിച്ചിട്ടുണ്ട്. റാലി എഫ് 9 പാർക്കിന് സമീപമെത്തിയപ്പോൾ പൊലീസ് പിടിഐ പ്രവർത്തകരെ അറസ്റ്റ് ചെയ്യാൻ ആരംഭിക്കുകയായിരുന്നു.
രണ്ട് സ്ത്രീകളുൾപ്പടെ നാല് പിടിഐ പ്രവർത്തകരെ ഇസ്ലാമബാദ് പൊലീസ് അറസ്റ്റ് ചെയ്‌തിട്ടുണ്ട്. ജിന്ന അവന്യൂവിൽ നിന്ന് പൊലീസ് പിടിഐ പ്രവർത്തകരെ ഒഴിപ്പിച്ചു. തെരഞ്ഞെടുപ്പ് തീയതി സംബന്ധിച്ച് ജുഡീഷ്യറിയും സർക്കാരും തമ്മിലുള്ള തർക്കത്തിനിടെ സുപ്രീം കോടതിയോടും പാകിസ്ഥാൻ ചീഫ് ജസ്റ്റിസിനോടും (സിജെപി) ഉമർ അത്താ ബാൻഡിയലിനോടും ഐക്യദാർഢ്യം പ്രകടിപ്പിക്കാൻ ശനിയാഴ്‌ച പിടിഐ പാകിസ്ഥാനിലുടനീളം റാലികൾ നടത്തുകയായിരുന്നു.