ജനീവ (സ്വിറ്റ്‌സര്‍ലന്‍ഡ്): ഏറ്റവും മനോഹരമായ റെയില്‍ ട്രാക്കുകളിലൊന്നായ ആൽപ്‌സ് പർവതനിരകളിലൂടെ ലോകത്തിലെ ഏറ്റവും നീളമുള്ള പാസഞ്ചർ ട്രെയിനോടിക്കാനൊരുങ്ങി സ്വിസ് റെയില്‍വേ കമ്പനിയായ റാറ്റിയൻ റെയിൽവേ. ആല്‍പ്‌സിലെ ആല്‍ബുല/ ബെര്‍നിന റൂട്ടിലൂടെ പ്രെഡയിൽ നിന്ന് ബെർഗ്യൂനിലേക്ക് 100 കോച്ചുകളും നാല് എഞ്ചിനും ഉള്‍പ്പെടുന്ന 1.9 കിലോമീറ്റർ നീളമുള്ള (1.2 മൈൽ) പാസഞ്ചർ ട്രെയിനോടിച്ച് റെക്കോര്‍ഡ് സ്ഥാപിക്കാനാണ് റാറ്റിയൻ റെയിൽവേ ലക്ഷ്യമിടുന്നത്.
'100 കോച്ചുകൾ നാല് എഞ്ചിൻ': ലോകത്തെ ഏറ്റവും മനോഹര പാതയില്‍ ഏറ്റവും വലിയ പാസഞ്ചർ ട്രെയിൻ ഓടിക്കാൻ സ്വിസ് റെയില്‍ കമ്പനി
സ്വിസ് റെയിൽവേയുടെ 175 വർഷം ആഘോഷിക്കാനാണ് യുനെസ്‌കോയുടെ ലോക പൈതൃക പട്ടികയില്‍ ഇടം പിടിച്ച റെയില്‍ ലൈനിലൂടെ ഏറ്റവും വലിയ പാസഞ്ചർ ട്രെയിൻ ഓടിക്കുന്നത്.
വെറുതോ ഒരു ഓട്ടമല്ല, 'റെക്കോര്‍ഡ് ഓട്ടം'; ആൽപ്‌സ് പർവതനിരകളിലൂടെ ഏറ്റവും നീളം കൂടിയ ട്രെയിനോടിച്ച് റെക്കോര്‍ഡ് സ്വന്തമാക്കാന്‍ സ്വിസ് റെയിൽവേ
ഒരുപാട് വളവുകളുള്‍പ്പടെ 22 ടണലുകളും ലാൻഡ്‌വാസർ വയഡക്റ്റുള്‍പ്പടെ 48 പാലങ്ങളും കടന്നുപോകുന്ന ഈ ആല്‍ബുല/ ബെര്‍നിന റെയില്‍ പാത 2008-ൽ യുനെസ്‌കോയുടെ ലോക പൈതൃക പട്ടികയില്‍ ഇടം പിടിച്ചിരുന്നു. ഏതാണ്ട് 25 കിലോമീറ്റര്‍ (15.5 മൈല്‍) ദൂരം പിന്നിടുന്ന ഈ യാത്രയ്‌ക്ക് ഒരു മണിക്കൂര്‍ വേണ്ടിവരുമെന്നാണ് അധികൃതരുടെ വിലയിരുത്തല്‍.
മാത്രമല്ല സ്വിറ്റ്‌സർലൻഡിന്‍റെ നിര്‍മിതികളില്‍ ചിലത് ഉയർത്തിക്കാട്ടാനും സ്വിസ് റെയിൽവേയുടെ 175 വർഷം ആഘോഷിക്കാനുമാണ് ഈ റെക്കോ‍ഡ് ഓട്ടമെന്ന് റാറ്റിയൻ റെയിൽവേ ഡയറക്‌ടർ റെനറ്റോ ഫാസിയാറ്റി പറഞ്ഞു.