Kim Jong Un Reached Russia കിം ജോങ് ഉൻ റഷ്യയിലെത്തി; പുടിനുമായി ഉഭയകക്ഷി ചര്‍ച്ച നടത്തും

Kim's Official Welcoming held in Khazan : റഷ്യൻ അതിർത്തിയിലുള്ള ഖസാനിൽ കിമ്മിനെ റഷ്യയിലേക്ക് സ്വാഗതം ചെയ്‌തുകൊണ്ട് ഔദ്യോഗിക പരിപാടികൾ നടന്നതായി റിപ്പോര്‍ട്ടുണ്ട്

സോൾ: ഉത്തരകൊറിയൻ ഭരണാധികാരി കിം ജോങ് ഉൻ റഷ്യയിലെത്തി (Kim Jong Un Reached Russia). റഷ്യൻ പ്രസിഡന്‍റ് വ്ലാഡിമിർ പുടിന്‍റെ (Vladimir Putin) ക്ഷണം ലഭിച്ചതിനു പിന്നാലെ തന്‍റെ ആഡംബര ട്രെയിനിലാണ് കിം റഷ്യയിലെത്തിയത്. ഇന്നുതന്നെ കിം പുടിനുമായി ഉഭയകക്ഷി കൂടിക്കാഴ്‌ച നടത്തുമെന്നാണ് വിവരം (Kim Jong Un Hold bilateral Talks with Putin). നാലു വർഷത്തിനുശേഷമാണ് പുടിനും കിമ്മും തമ്മിൽ നേരിട്ട് കൂടിക്കാഴ്‌ച നടത്തുന്നത്. കൊവിഡ് മഹാമാരിയ്ക്കു ശേഷം കിം ജോങ് ഉൻ നടത്തുന്ന ആദ്യ വിദേശ യാത്ര കൂടിയാണ് ഇത്.

യുക്രൈൻ യുദ്ധമുഖത്ത് (Ukrain War) ഉപയോഗിക്കാൻ ഉത്തര കൊറിയയിൽ നിന്ന് കൂടുതൽ ആയുധങ്ങൾ വാങ്ങുന്നതുമായി ബന്ധപ്പെട്ട ചർച്ചകളാണ് ഇരു നേതാക്കളും നടത്തുക എന്നാണ് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നത്. തങ്ങൾ നൽകുന്ന ആയുധങ്ങൾക്ക് പകരം ഭൂഖണ്ഡാന്തര ബാലിസ്റ്റിക് മിസൈലുകൾ, ആണവ ശേഷിയുള്ള ബാലിസ്റ്റിക് മിസൈൽ, അന്തർവാഹിനികൾ, സൈനിക നിരീക്ഷണ ഉപഗ്രഹങ്ങൾ എന്നിവയും ഊർജ്ജ-ഭക്ഷ്യ സഹായങ്ങളുമാകും ഉത്തര കൊറിയ തിരികെ ആവശ്യപ്പെടുക എന്നാണ് വിവരം.

റഷ്യൻ അതിർത്തിയിലുള്ള ഖസാനിൽ കിമ്മിനെ റഷ്യയിലേക്ക് സ്വാഗതം ചെയ്തുകൊണ്ട് ഔദ്യോഗിക പരിപാടികൾ നടന്നതായി ജപ്പാൻ ടി.വി നെറ്റ്‌വർക്കായ ജെ എൻ എൻ റിപ്പോർട്ട് ചെയ്യുന്നുണ്ട്. ഖസാനിൽ നിന്ന് പുടിൻ-കിം ചർച്ച നടക്കുന്ന വ്ളാദിവോസ്തോകിലേക്ക് 150 കിലോമീറ്റർ ദൂരമുണ്ട്. ബുധനാഴ്ച വരെ നടക്കുന്ന അന്താരാഷ്ട്ര ഫോറത്തിൽ പങ്കെടുക്കാൻ പുടിൻ തിങ്കളാഴ്‌ച വ്ളാദിവോസ്തോകിൽ എത്തിയതായി റഷ്യയുടെ ടാസ് വാർത്താ ഏജൻസിയും റിപ്പോർട്ട് ചെയ്‌തു. പ്യോങ്‌യാങ്ങിൽ നിന്ന് ഏകദേശം 425 മൈൽ (680 കിലോമീറ്റർ) വടക്ക് സ്ഥിതി ചെയ്യുന്ന ഈ നഗരം 2019 ൽ കിമ്മുമായുള്ള പുടിന്‍റെ ആദ്യ കൂടിക്കാഴ്‌ചയ്ക്കും വേദിയായിരുന്നു.

ഞായറാഴ്‌ച ഉച്ചതിരിഞ്ഞ് തലസ്ഥാനമായ പ്യോങ്‌യാങ്ങിൽ നിന്നാണ് കിം തന്‍റെ സ്വകാര്യ ട്രെയിനിൽ യാത്ര തുടങ്ങിയത്. യാത്ര പുറപ്പെടും മുൻപ് ട്രെയിനിൽ നിന്ന് കയ്യുയർത്തി ജനക്കൂട്ടത്തെ അഭിവാദ്യം ചെയ്യുന്ന കിമ്മിന്‍റെ ചിത്രങ്ങൾ ഉത്തര കൊറിയ പുറത്തുവിട്ടിരുന്നു. ഉത്തര കൊറിയയുടെ ക്യാബിനറ്റ് പ്രീമിയർ കിം ടോക് ഹുൻ ഉൾപ്പെടെ, വിദേശകാര്യ മന്ത്രി, മുതിർന്ന സൈനിക ഉദ്യോഗസ്ഥർ, ആയുധ വിഭാഗം കൈകാര്യം ചെയ്യുന്ന ഉന്നത ഉദ്യോഗസ്ഥർ തുടങ്ങിയവർ യാത്രയിൽ കിമ്മിനെ അനുഗമിക്കുന്നുണ്ടെന്നാണ് ഉത്തര കൊറിയയുടെ ഔദ്യോഗിക സെൻട്രൽ ന്യൂസ് ഏജൻസി പുറത്തുവിടുന്ന വിവരം.

പുടിന്‍റെ ക്ഷണപ്രകാരമാണ് കിമ്മിന്‍റെ സന്ദർശനമെന്നും വരും ദിവസങ്ങളിൽ തന്നെ ഇത് നടക്കുമെന്നും കഴിഞ്ഞ ദിവസം ക്രെംലിൻ വെബ്‌സൈറ്റിൽ ഒരു പ്രസ്‌താവന പ്രസിദ്ധീകരിച്ചിരുന്നു. പുടിനും കിമ്മും തങ്ങളുടെ പ്രതിനിധികളെയാകും ആദ്യം ചർച്ചകൾക്ക് അയക്കുകയെന്നും ആവശ്യമെങ്കിൽ മാത്രം ഇരു നേതാക്കളും പരസ്‌പരം കാണുമെന്നും ക്രെംലിൻ വക്താവ് ദിമിത്രി പെസ്കോവ് പറഞ്ഞു. കിമ്മിനായി പുടിൻ ഔദ്യോഗിക വിരുന്നൊരുക്കുമെന്നും അദ്ദേഹം വ്യക്തമാക്കി. ഉഭയകക്ഷി ബന്ധത്തിൽ ഊന്നൽ നൽകുന്നതാകും ചർച്ച. അയൽക്കാരെ പോലെ സുദൃഢവും പരസ്പരം പ്രയോജനപ്പെടുത്താവുന്നതുമായ ബന്ധം വളർത്തിയെടുക്കാൻ ഞങ്ങൾ ബാധ്യസ്ഥരാണെന്ന് അദ്ദേഹം കൂട്ടിച്ചേർത്തു.

അതേസമയം ഉത്തരകൊറിയയിൽ നിന്ന് റഷ്യയിലേക്ക് ആയുധങ്ങൾ കൈമാറുന്നത് ഒന്നിലധികം യുഎൻ രക്ഷാസമിതി പ്രമേയങ്ങളുടെ ലംഘനമാകുമെന്നും പുതിയ ഉപരോധങ്ങൾ ഏർപ്പെടുത്താൻ തങ്ങൾ മടിക്കില്ലെന്നും യുഎസ് സ്റ്റേറ്റ് ഡിപ്പാർട്ട്‌മെന്‍റ് വക്താവ് മാത്യു മില്ലർ വ്യക്തമാക്കി. സ്ഥിതിഗതികൾ നിരീക്ഷിച്ചുവരികയാണെന്നും ഊഹാപോഹങ്ങൾക്കപ്പുറം കിം-പുടിൻ കൂടിക്കാഴ്ചയുടെ പരിണിതഫലങ്ങൾ കാത്തിരുന്നു കാണാമെന്നും മാത്യു മില്ലർ പറഞ്ഞു.