ഇസ്‍ലാമാബാദ്: വംശീയവും മതപരവുമായ സംഘർഷങ്ങൾ ഇല്ലാതാക്കാനും, ഇന്ത്യ ഉൾപ്പെടെയുള്ള അയൽ രാജ്യങ്ങളുമായി മികച്ച ബന്ധം തുടരുന്നതിനും പാകിസ്ഥാനിലെ പുതിയ സർക്കാരിനോട് അഭ്യർഥിച്ച് ഒരു കൂട്ടം സാമൂഹ്യ പ്രവർത്തകർ. സൗത്ത് ഏഷ്യൻസ് എഗെയിൻസ്റ്റ് ടെററിസം ആൻഡ് ഹ്യൂമൻ റൈറ്റ്‌സ് (സാത്ത്) സംഘടിപ്പിച്ച വെർച്വൽ കോൺഫറൻസിലൂടെയാണ് ഇവർ ആവശ്യം ഉന്നയിച്ചത്.
ബലൂചിസ്ഥാനിലെ അക്രമങ്ങൾക്ക് സൗഹാർദപരമായ പരിഹാരം കാണുന്നതിന് ബലൂച് ദേശീയവാദികളുമായി ഇടപഴകണമെന്നും പുതുതായി സ്ഥാനമേറ്റ ഷെഹ്‌ബാസ് ഷെരീഫ് സർക്കാരിനോട് കോൺഫറൻസിൽ പങ്കെടുത്തവർ ആവശ്യപ്പെട്ടു. അയൽ രാജ്യങ്ങളുമായി, പ്രത്യേകിച്ച് ഇന്ത്യയുമായും അഫ്‌ഗാനിസ്ഥാനുമായും ഉള്ള ബന്ധം മെച്ചപ്പെടുത്തണമെന്നും ഇവർ ആവശ്യം ഉന്നയിച്ചു.
ഭീകരത അവസാനിപ്പിക്കണം: രാഷ്‌ട്രീയത്തിലെ സൈനികവത്കരണവും രാഷ്ട്രീയ ലക്ഷ്യങ്ങൾക്കായി മതത്തിന്‍റെ ഉപയോഗവും അവസാനിപ്പിക്കണമെന്ന് സാത്ത് സഹസ്ഥാപകനും അമേരിക്കയിലെ പാകിസ്ഥാൻ മുൻ അംബാസഡറുമായ ഹുസൈൻ ഹഖാനി പറഞ്ഞു. പാകിസ്ഥാൻ ഭരണകൂടത്തിന്‍റെ ശ്രദ്ധ അവിടെത്തെ ജനങ്ങളുടെ അഭിവൃദ്ധിയിലായിരിക്കണമെന്നും തെറ്റായ നിർവചിക്കപ്പെട്ട ആശയത്തിലായിരിക്കരുതെന്നും അദ്ദേഹം പറഞ്ഞു.