Colombian Serial Killer Luis Alfredo Garavito Cubillos Died: 190 ലധികം കുട്ടികളെ കൊലപ്പെടുത്തിയ കൊളംബിയൻ സീരിയൽ കില്ലർ ലൂയിസ് ഗ്രാവിറ്റോ മരണപ്പെട്ടു

Serial Killer Who Confessed Murdering 190 Children Died: 1990 കളിൽ 190 ലധികം കുട്ടികളെ കൊലപ്പെടുത്തിയ കേസിൽ ശിക്ഷ അനുഭവിച്ചുകൊണ്ടിരിക്കുന്നയാളാണ് ലൂയിസ് ആൽഫ്രെഡോ ഗ്രാവിറ്റോ ക്യൂബിലോസ്

ബൊഗോട്ട : കൊളംബിയൻ സീരിയൽ കില്ലർ ലൂയിസ് ആൽഫ്രെഡോ ഗ്രാവിറ്റോ ക്യൂബിലോസ് (66) (Luis Alfredo Garavito Cubillos) മരണപ്പെട്ടു. 1990 കളിൽ 190 ലധികം കുട്ടികളെ കൊലപ്പെടുത്തിയ കേസിലെ പ്രതിയാണ് ലൂയിസ്. വ്യാഴാഴ്‌ച (12.10.2023) വടക്കൻ കൊളംബിയയിലെ വല്ലെദുപാർ മേഖലയിലെ ആശുപത്രിയൽ വച്ചാണ് അന്ത്യം സംഭവിച്ചതെന്ന് ജയിൽ അധികൃതർ അറിയിച്ചു. മരണകാരണം വെളിപ്പെടുത്തിയിട്ടില്ല.

ലോകത്തിലെ ഏറ്റവും ക്രൂരനായ സീരിയർ കില്ലറായ (Serial Killer) ഇയാൾ 'ദ ബീസ്റ്റ്' എന്നാണ് അറിയപ്പെട്ടിരുന്നത്. 1992 ലാണ് ലൂയിസ് തന്‍റെ കൊലപാതക പരമ്പര ആരംഭിക്കുന്നത്. ആറിനും 16നും ഇടയിൽ പ്രായമുള്ള ആൺ കുട്ടികളെയാണ് ഇയാൾ ക്രൂരമായി ബലാത്സംഗം ചെയ്‌ത് കൊലപ്പെടുത്തിയരുന്നത്.

1957 ൽ കൊളംബിയയിലെ ക്വിൻഡോയിലായിരുന്നു ലൂയിസിന്‍റെ ജനനം. അക്രമവും അവഗണനയും നിറഞ്ഞ ഒരു ബാല്യകാലത്തിലൂടെ കടന്നു പോയ ലൂയിസ് പിന്നീട് ലോകം കണ്ട കൊടും കുറ്റവാളിയായി മാറുകയായിരുന്നു. 1992 ലാണ് കൊളംബിയയിൽ നിരവധി കുട്ടികൾ പെട്ടെന്ന് അപ്രത്യക്ഷരാകാൻ തുടങ്ങിയത്. എന്നാൽ അന്ന് കേസിൽ യാതൊരു വിവരവും കണ്ടെത്താൻ പൊലീസിന് കഴിഞ്ഞില്ല.

പിന്നീട് 1994 മുതൽ 59 കൊളംബിയൻ പട്ടണങ്ങളിൽ നിന്നായി 114 കുട്ടികളുടെ മൃതദേഹങ്ങൾ പൊലീസിന് ലഭിച്ചു. ഒരേ രീതിയിൽ കൊല്ലപ്പെട്ട ആൺകുട്ടികളുടെ മൃതദേഹങ്ങളാണ് പൊലീസ് കണ്ടെത്തിയത്. ഇതോടെ കേസിന്‍റെ ഗൗരവം പൊലീസ് മനസിലാക്കുകയായിരുന്നു.

ബലാത്സംഗക്കേസിലെ അറസ്‌റ്റിന് പിന്നാലെ തെളിഞ്ഞത് നൂറുകണക്കിന് കൊലപാതകങ്ങൾ : 1998 ൽ കൊല നടന്ന സ്ഥലത്ത് വച്ച് പൊലീസിന് ഇയാളുമായി ബന്ധപ്പെട്ട വിലാസം ലഭിച്ചതോടെയാണ് കേസിൽ വഴിത്തിരിവുണ്ടാകുന്നത്. പിന്നാലെ 1999 ഏപ്രിലിൽ ബലാത്സംഗശ്രമ കേസിൽ ലൂയിസ് അറസ്‌റ്റിലായി. കേസിന്‍റെ വിചാരണയിൽ കൊലപാതകങ്ങളെ കുറിച്ച് ജഡ്‌ജി ചോദിച്ചപ്പോൾ ഇയാൾ കുറ്റസമ്മതം നടത്തുകയായിരുന്നു. 190 കൊലപാതകങ്ങളാണ് അയാൾ ഏറ്റുപറഞ്ഞത്.

പുരോഹിതന്‍റേയോ തെരുവ് കച്ചവടക്കാരന്‍റേയോ വേഷത്തിലെത്തി പ്രലോഭിച്ച് തട്ടിക്കൊണ്ടുപോയി അതിധാരുണമായി പീഡിപ്പിച്ചാണ് ഇയാൾ കുട്ടികളെ കൊലപ്പെടുത്തിയിരുന്നതെന്നാണ് വിവരം. കോടതി വിചാരണക്കിടെ ലൂയിസ് ഇരകളുടെ കുടുംബാംഗങ്ങളോട് ക്ഷമാപണം നടത്തിയിരുന്നു. 22 വർഷത്തേയ്‌ക്കാണ് ഇയാൾ ശിക്ഷിക്കപ്പെട്ടത്.

തുടർന്ന് 2021 ലാണ് ഇയാൾ ജയിൽ മോചിതനാകേണ്ടയിരുന്നത്. എന്നാൽ, 2021 ൽ അന്നത്തെ പ്രസിഡന്‍റ് ഇവൻ ഡ്യൂക്ക് കുട്ടികൾക്കെതിരെ അതിക്രൂര കുറ്റകൃത്യം നടത്തിയ ലീയിസിനെ ജയിൽമോചിതനാക്കുന്നത് നിരസിക്കുകയായിരുന്നു.