ജെറുസലേം : ഇസ്രയേലിൽ ബെഞ്ചമിന്‍ നെതന്യാഹു സർക്കാർ പുറത്ത്. പുതിയ സഖ്യകക്ഷി സര്‍ക്കാരിന് പാര്‍ലമെന്‍റിന്‍റെ അംഗീകാരം. 59 നെതിരെ 60 വോട്ടുകൾക്ക് സഖ്യകക്ഷി സർക്കാർ വിശ്വാസവോട്ട് നേടി. നഫ്തലി ബെന്നറ്റ് ആണ് പുതിയ പ്രധാനമന്ത്രി. ഇതോടെ 12 വർഷം നീണ്ട നെതന്യാഹു യുഗത്തിന് അന്ത്യം.
ബെഞ്ചമിൻ നെതന്യാഹുവിന്‍റെ മുന്‍ അനുയായിയും വലതുപക്ഷ പാര്‍ട്ടി യമിനയുടെ നേതാവുമാണ് നഫ്തലി ബെന്നറ്റ്. അടിയന്തര കെനെസ്സെറ്റ് ചേര്‍ന്നാണ് വിശ്വാസ വോട്ടെടുപ്പ് നടത്തിയത്.
നഫ്തലി ബെന്നറ്റും മറ്റൊരു പ്രതിപക്ഷ കക്ഷി നേതാവായ യായിർ ലാപ്പിഡും തമ്മിലുണ്ടാക്കിയ കരാര്‍ പ്രകാരം പ്രധാനമന്ത്രിപദത്തിലെ ആദ്യ ഊഴം നഫ്തലിക്ക് ആയിരിക്കും. 2023 സെപ്റ്റംബർ വരെയാകും ബെന്നറ്റിന്‍റെ കാലാവധി. അതിനുശേഷമുള്ള രണ്ടുവര്‍ഷം ലാപിഡ് ഭരിക്കും.