ടെഹ്‌റാൻ: ഉക്രൈൻ വിമാനം ഇറാന്‍റെ മിസൈലേറ്റ് തകര്‍ന്ന് വീഴുന്ന ദൃശ്യങ്ങള്‍ സമൂഹ മാധ്യമങ്ങളില്‍ പങ്കുവെച്ചയാള്‍ അറസ്റ്റില്‍. ഇറാൻ റവല്യൂഷണറി ഗാര്‍ഡ്സ് ആണ് ഇയാളെ അറസ്റ്റ് ചെയ്തതെന്ന് ഇറാൻ മാധ്യമങ്ങള്‍ റിപ്പോര്‍ട്ട് ചെയ്‌തു. ഇറാന്‍റെ സൈനിക കേന്ദ്രങ്ങളില്‍ നിന്നുള്ള രണ്ട് മിസൈലുകളേറ്റാണ് ടെഹ്‌റാനില്‍ ഉക്രൈൻ വിമാനം തകര്‍ന്ന് വീണതെന്ന് വ്യക്തമാക്കുന്ന ദൃശ്യങ്ങളാണ് കഴിഞ്ഞ ദിവസം പുറത്തു വന്നത്. വിമാനപഥത്തില്‍ നിന്ന് എട്ട് മൈല്‍ അകലെ നിന്നാണ് മിസൈല്‍ വിക്ഷേപിച്ചത്. മിസൈലേറ്റ് തീപിടിച്ച വിമാനം ടെഹ്‌റാനിലെ വിമാനത്താവളത്തിലേക്ക് പറക്കുന്നതും ദൃശ്യങ്ങളില്‍ നിന്ന് വ്യക്തമാണ്.
ഉക്രൈൻ വിമാനം തകര്‍ന്ന് വീഴുന്ന ദൃശ്യങ്ങള്‍ പുറത്തുവിട്ടയാള്‍ അറസ്റ്റില്‍ - ഇറാൻ
ഇറാന്‍റെ മിസൈലേറ്റാണ് ഉക്രൈൻ വിമാനം തകര്‍ന്ന് വീണതെന്ന് വ്യക്തമാക്കുന്ന ദൃശ്യങ്ങളാണ് പുറത്തുവന്നത്.
ഉക്രൈൻ വിമാനം തകര്‍ന്ന് വീഴുന്ന ദൃശ്യങ്ങള്‍ പുറത്തുവിട്ടയാള്‍ അറസ്റ്റില്‍
ജനുവരി എട്ടിനാണ് ഇമാം ഖൊമൈനി അന്താരാഷ്‌ട്ര വിമാനത്താവളത്തില്‍ നിന്നും പറന്നുയര്‍ന്ന വിമാനം മിനിറ്റുകൾക്കുള്ളില്‍ തകര്‍ന്നുവീണ് 176 പേര്‍ കൊല്ലപ്പെട്ടത്. ആദ്യം നിഷേധിച്ചെങ്കിലും പിന്നീട് ആക്രമണത്തിന്‍റെ ഉത്തരവാദിത്തം ഏറ്റെടുത്ത് ഇറാൻ രംഗത്തെത്തിയിരുന്നു. ശത്രുവിമാനമാണെന്ന് കരുതിയാണ് ആക്രമിച്ചതെന്നായിരുന്നു ഇറാന്‍റെ വിശദീകരണം. ഇതേതുടര്‍ന്ന് ഇറാനില്‍ പ്രതിഷേധം ശക്തമായിരുന്നു.
സംഭവത്തെ കുറിച്ച് വിശദമായ അന്വേഷണം നടക്കുകയാണ്. ആക്രമണത്തിന് ഉത്തരവാദികളായ ചിലരെ കഴിഞ്ഞ ദിവസം അറസ്റ്റ് ചെയ്തിരുന്നു.