ലണ്ടൻ: കൊവിഡ് ബാധിതർക്ക് നല്‍കാനുള്ള ഗുളികയുടെ ഉപയോഗത്തിന് ബ്രിട്ടൺ അനുമതി നല്‍കി. കൊവിഡ് ലക്ഷണമുള്ളവർക്ക് ദിവസം രണ്ടു നേരം നല്‍കുന്നതാണ് അമേരിക്കൻ ഫാർമ കമ്പനിയായ മെർക്ക് ആൻഡ് ബയോടക്‌നോളജി കമ്പനി റിഡ്‌ജ്ബൈക് ബയോതെറാപിറ്റ്‌ക്‌സ്‌ നിർമിക്കുന്ന മോൾനുപിരവിർ എന്ന ആന്‍റിവൈറല്‍ ഗുളിക. ബ്രിട്ടീഷ് മെഡിസിൻ റെഗുലേറ്ററാണ് ഗുളികയ്ക്ക് അനുമതി നല്‍കിയത്.
ലോകത്ത് ആദ്യമായാണ് ഒരു ആന്‍റിവൈറല്‍ ഗുളികയ്ക്ക് കൊവിഡ് ചികിത്സയ്ക്കായി അനുമതി ലഭിക്കുന്നത്. ഉയർന്ന അപകട സാധ്യതയുള്ള രോഗികൾക്കും ആശുപത്രിയില്‍ പ്രവേശിപ്പിക്കേണ്ടി വരുന്ന മരണ സാധ്യതയുള്ളവർക്കും ഈ ഗുളിക ഫലപ്രദമാണെന്ന് നിർമാതാക്കൾ പറയുന്നു. കൊവിഡ് ബാധിച്ച് ലക്ഷണങ്ങൾ കണ്ടാല്‍ അഞ്ച് ദിവസത്തിനകം ഗുളിക നല്‍കാമെന്നാണ് ബ്രിട്ടീഷ് ആരോഗ്യ വകുപ്പിന്‍റെ നിർദ്ദേശം.