തുര്‍ക്കിയില്‍ വിമാനാപകടം; മൂന്ന് മരണം, 179 പേര്‍ക്ക് പരിക്ക് - ഇസ്‌താംബൂള്‍ വിമാനാപകടം
ലാന്‍ഡിങ്ങിനിടെ റണ്‍വേയില്‍ നിന്ന് തെന്നിമാറിയ വിമാനത്തിന് തീപിടിച്ച് മൂന്നായി പിളരുകയായിരുന്നു.
ഇസ്‌താംബൂള്‍: ഇസ്‌താംബൂളിലെ വിമാനത്താവളത്തില്‍ ലാന്‍ഡിങ്ങിനിടെയുണ്ടായ വന്‍ വിമാനാപകത്തില്‍ മൂന്ന് പേര്‍ മരിച്ചു. 179 പേര്‍ക്ക് പരിക്കേല്‍ക്കുകയും ചെയ്‌തിട്ടുണ്ട്. ലാന്‍ഡിങ്ങിനിടെ റണ്‍വേയില്‍ നിന്ന് തെന്നിമാറിയ വിമാനത്തിന് തീപിടിച്ച് മൂന്നായി പിളരുകയായിരുന്നു. കാലാവസ്ഥ മോശമായതാണ് ലാന്‍ഡിങ് പിഴയ്‌ക്കാന്‍ കാരണമെന്നാണ് പ്രാഥമിക വിവരം. ബോയിങ് 737 വിഭാഗത്തില്‍പ്പെട്ട വിമാനം എയ്‌ജിയന്‍ പോര്‍ട്ട് സിറ്റിയില്‍ നിന്നുമാണ് ഇസ്‌താംബൂളിലേക്ക് വന്നത്. 177 യാത്രക്കാരും ആറ് ജീവനക്കാരുമാണ് വിമാനത്തിലുണ്ടായിരുന്നത്. ശക്‌തമായ കാറ്റാണ് വിമാനം ലാന്‍ഡ് ചെയ്യുമ്പോള്‍ അപകടമുണ്ടാക്കിയത്. നിയന്ത്രണം നഷ്‌ടപ്പെട്ട വിമാനം 60 മീറ്ററോളം റണ്‍വേയിലൂടെ നിരങ്ങി നീങ്ങി പിന്നാലെയാണ് തീപിടിച്ചതും മൂന്നായി പിളര്‍ന്നതും. അഗ്നിശമന സേന ഉടന്‍ രക്ഷാപ്രവര്‍ത്തനം ആരംഭിച്ചത് മരണസംഖ്യ കുറയുന്നതിന് സഹായിച്ചു. പരിക്കേറ്റവര്‍ മേഖലയിലെ വിവിധ ആശുപത്രികളില്‍ ചികിത്സയിലാണ്. ഇവരില്‍ ചിലരുടെ നില ഗുരുതരമാണ്. സംഭവത്തില്‍ അന്വേഷണം ആരംഭിച്ചിട്ടുണ്ടെന്ന് ഇസ്‌താംബൂള്‍ പബ്ലിക് പ്രോസിക്യൂട്ടര്‍ അറിയിച്ചു.