കാബൂള്‍: അഫ്‌ഗാനിസ്ഥാന്‍ മുന്‍ വൈസ് പ്രസിഡന്‍റും പ്രതിരോധ സേന തലവനുമായ അമറുല്ല സ്വാലിഹിന്‍റെ സഹോദരനെ താലിബാന്‍ വധിച്ചതായി റിപ്പോര്‍ട്ട്. അമറുല്ല സ്വാലിഹിന്‍റെ മൂത്ത സഹോദരന്‍ റോഹുല്ല അസീസിയെയാണ് താലിബാന്‍ കൊലപ്പെടുത്തിയത്.
പഞ്ച്ഷീർ പ്രവശ്യ തലസ്ഥാനമായ ബസറാക്ക് താലിബാൻ കീഴടക്കിയതിന് പിന്നാലെയാണ് സാലിഹിന്‍റെ സഹോദരനെ താലിബാന്‍ വധിച്ചത്. പഞ്ച്ഷീറില് നിന്ന് രക്ഷപ്പെടാന്‍ ശ്രമിക്കുന്നതിനിടെ താലിബാന്‍ പിടികൂടി വെടിവയ്ക്കുകയായിരുന്നുവെന്ന് അഫ്‌ഗാന്‍ മാധ്യമപ്രവര്‍ത്തകയായ സാറ റാഹിമി ട്വീറ്റ് ചെയ്‌തു.
അതേസമയം, ഇസ്‌ലാം വിശ്വാസ പ്രകാരം റോഹുല്ല അസീസിയുടെ സംസ്‌കാരം നടത്താന്‍ താലിബാന്‍ അനുവദിക്കുന്നില്ലെന്ന് കുടുംബം ആരോപിച്ചു. തുറസായ സ്ഥലത്ത് മൃതദേഹം അഴുകണമെന്ന് താലിബാന്‍ പറഞ്ഞതായി കുടുംബാംഗങ്ങളെ ഉദ്ദരിച്ച് റോയിറ്റേഴ്‌സ് റിപ്പോര്‍ട്ട് ചെയ്‌തു.