പാർലമെന്‍റ് പിരിച്ചുവിട്ടതിനെതിരെ നേപ്പാളിൽ പ്രതിഷേധം തുടരുന്നു

കഴിഞ്ഞ ദിവസം പ്രതിപക്ഷ സഖ്യം പ്രസിഡന്‍റിന്‍റെയും പ്രധാനമന്ത്രിയുടെയും കോലം കത്തിച്ചിരിന്നു. കൂടാതെ നേപ്പാൾ വിദ്യാർഥി കോൺഗ്രസ് പ്രതിഷേധവും അക്രമാസക്തമായിരുന്നു.

കാഠ്‌മണ്ഡു:നേപ്പാളിൽ പാർലമെന്‍റ് വീണ്ടും പിരിച്ചുവിടുന്നതിനെതിരെ പ്രതിഷേധം തുടർന്ന് പ്രതിപക്ഷ സഖ്യം. രാജ്യത്തെ കൊവിഡ് കേസുകൾ ഉയരുകയും കൊവിഡ് മാനദണ്ഡങ്ങൾ നിലനിൽക്കുകയും ചെയ്യുന്ന സാഹചര്യത്തിലാണ് പ്രതിഷേധം നടക്കുന്നത്. പ്രസിഡന്‍റ് ബിദ്യ ഭണ്ഡാരിക്കും പ്രധാനമന്ത്രി കെ.പി. ശർമ ഒലിക്കുമെതിരെ രണ്ട് ഡസനിലധികം റിട്ട് ഹർജികളും സുപ്രീംകോടതിയിൽ നിലവിലുണ്ട്. പ്രതിപക്ഷ സഖ്യവും തിങ്കളാഴ്‌ച ഹർജി സമർപ്പിച്ചേക്കും.

ഒലിയെ പ്രധാനമന്ത്രിയായി നിയമിച്ചിട്ടില്ലെന്ന് ആരോപിച്ച് അഭിഭാഷകനായ കൃഷ്‌ണ ഭണ്ഡാരിയും റിട്ട് ഹർജി സമർപ്പിച്ചിട്ടുണ്ട്. ഒലിക്ക് അനുകൂലമായ റിട്ടുകൾ അദ്ദേഹത്തെ പ്രധാനമന്ത്രി ആക്കണമെന്നും ഡ്യൂബയ്ക്ക് അനുകൂലമായ റിട്ടുകൾ പ്രധാനമന്ത്രി സ്ഥാനം അദ്ദേഹത്തിന് നൽകണമെന്നും വാദിക്കുന്നവയാണ്. എന്നാൽ റിട്ടുകളൊന്നും ഇതുവരെ രജിസ്റ്റർ ചെയ്‌തിട്ടില്ലെന്നും പരിശോധനകൾ നടന്നുകൊണ്ടിരിക്കുകയാണെന്നും സുപ്രീംകോടതി അധികൃതർ അറിയിച്ചു.

കഴിഞ്ഞ ദിവസം ഉച്ചയോടെ പ്രതിപക്ഷ സഖ്യം പ്രസിഡന്‍റ് ബിദ്യാദേവി ഭണ്ഡാരിയുടെയും പ്രധാനമന്ത്രി കെ.പി. ശർമ ഒലിയുടെയും കോലം ലളിത്പൂരിലെ പാടൻ മൾട്ടിപ്പിൾ കാമ്പസിന് മുന്നിൽ കത്തിച്ചിരുന്നു. പിന്നീട് പൊലീസ് ഇടപെട്ട് പ്രതിഷേധക്കാരെ പിരിച്ചുവിടുകയായിരുന്നു. നേരത്തെ നേപ്പാളി കോൺഗ്രസിന്‍റെ വിദ്യാർഥി വിഭാഗം പ്രസിഡന്‍റിന്‍റെ ഓഫീസിന് മുന്നിൽ പ്രതിഷേധിക്കുകയും മൂന്ന് വിദ്യാർഥി നേതാക്കളെ അറസ്റ്റ് ചെയ്യുകയും ചെയ്‌തിരുന്നു.

നേപ്പാൾ ഭരണഘടനയുടെ ആർട്ടിക്കിൾ 76 (7) അനുസരിച്ച് രണ്ടാം തവണയും പാർലമെന്‍റ് പിരിച്ചുവിട്ടതായി അറിയിച്ച് പ്രസിഡന്‍റിന്‍റെ ഓഫീസ് ശനിയാഴ്‌ച പ്രസ്‌താവന പുറത്തിറക്കിയിരുന്നു. മന്ത്രിസഭയുടെ ശുപാർശ പ്രകാരം അടുത്ത തെരഞ്ഞെടുപ്പ് നവംബർ 12, 19 തീയതികളിലായിരിക്കും.