സിയോൾ/ ഉത്തര കൊറിയ : ട്രെയിനിൽ നിന്ന് പരീക്ഷിച്ച രണ്ട് ബാലിസ്റ്റിക് മിസൈലുകൾ ബൈഡൻ ഭരണകൂടം ഏർപ്പെടുത്തിയ പുതിയ ഉപരോധങ്ങൾക്കെതിരായ പ്രത്യക്ഷ പ്രതികാരമെന്ന് ഉത്തര കൊറിയ. രണ്ട് ഉത്തരകൊറിയൻ മിസൈലുകൾ കടലിലേക്ക് തൊടുത്തുവിടുന്നത് കണ്ടെത്തിയതായി കഴിഞ്ഞ ദിവസം ദക്ഷിണ കൊറിയ റിപ്പോർട്ട് ചെയ്‌തതിന് പിന്നാലെയാണ് ഉത്തര കൊറിയ സ്ഥിരീകരണവുമായി രംഗത്തെത്തിയത്. ഒരു മാസത്തിനിടെ മൂന്നാം തവണയാണ് ഉത്തര കൊറിയ മിസൈൽ പരീക്ഷണംനടത്തുന്നത്.
മിസൈല്‍ പരീക്ഷണങ്ങളെ തുടര്‍ന്ന് അമേരിക്ക ഏർപ്പെടുത്തിയ ഉപരോധ നടപടികളെ വിമർശിച്ച് വിദേശകാര്യ മന്ത്രാലയം പ്രസ്‌താവന ഇറക്കിയിരുന്നു. വാഷിങ്‌ടൺ ഏറ്റുമുട്ടൽ നിലപാട് തുടരുകയാണെങ്കിൽ ശക്തമായ നടപടി ഉണ്ടാകുമെന്ന് മന്ത്രാലയം പ്രസ്‌താവനയിൽ പറയുന്നു. ഇത് പുറത്തുവന്ന് മണിക്കൂറുകൾക്കകമായിരുന്നു ഉത്തര കൊറിയയുടെ മിസൈൽ പരീക്ഷണം.
കൊവിഡുമായി ബന്ധപ്പെട്ട് അതിർത്തിയിൽ ഏർപ്പെടുത്തിയ നിയന്ത്രണങ്ങളും അമേരിക്കയുമായുള്ള ആണവ നയതന്ത്രത്തിന്‍റെ മരവിപ്പിക്കലും നിലനിൽക്കുന്നതിനിടയിലാണ് ഉത്തര കൊറിയയുടെ മിസൈൽ പരീക്ഷണങ്ങൾ. നിയന്ത്രണങ്ങളിൽ ഇളവുകൾക്കായുള്ള ചർച്ചകൾക്ക് മുൻപ് മിസൈൽ വിക്ഷേപണങ്ങളും ഭീഷണികളും കൊണ്ട് അമേരിക്കയെയും മറ്റ് അയൽരാജ്യങ്ങളെയും സമ്മർദ്ദത്തിലാക്കാനുള്ള ഉത്തര കൊറിയൻ ഭരണാധികാരി കിം ജോങ് ഉന്നിന്‍റെ തന്ത്രമാണിതെന്ന് വിദഗ്‌ധർ പറയുന്നു.