കാഠ്മണ്ഡു (നേപ്പാള്‍): ഇന്ത്യ- നേപ്പാള്‍ ഭൂപട വിവാദം ചൂടുപിടിച്ചുനില്‍ക്കേ ഇന്ത്യ വിരുദ്ധ മുദ്രാവാക്യം വിളിച്ച 20 പേരെ നേപ്പാള്‍ പൊലീസ് അറസ്‌റ്റ് ചെയ്‌തു. നിരോധിത മാവോയിസ്റ്റ് ഗ്രൂപ്പുമായി ബന്ധമുള്ള സംഘടനയിലെ അംഗങ്ങളായ വിദ്യാഥികള്‍ക്കെതിരെയാണ് പൊലീസ് നടപടി. സംഘടനയുടെ നേതാവ് നേത്ര ബിക്രം ചന്ദും പൊലീസിന്‍റെ പിടിയിലായിട്ടുണ്ട്.
ഇന്ത്യ പുറത്തിറക്കിയ ഭൂപടത്തില്‍ ഉത്തരാഖണ്ഡിലെ പിത്തോറഗഡ് ജില്ലയിൽ കാണിച്ചിട്ടുള്ള കാലാപാനിയെന്ന സ്ഥലം തങ്ങളുടേതാണെന്നാണ് നേപ്പാളിന്‍റെ അവകാശവാദം. നേപ്പാളിലെ ഡർച്ചുല ജില്ലയിലെ പ്രദേശമാണ് കാലാപാനിയെന്ന് നേപ്പാള്‍ മാധ്യമങ്ങൾ റിപ്പോർട്ട് ചെയ്തിരുന്നു. ഇതിന് പിന്നാലെയാണ് അതിര്‍ത്തി തര്‍ക്കം ഉടലെടുത്ത്. ജമ്മു കശ്‌മിരിനെ രണ്ട് കേന്ദ്രഭരണ പ്രദേശങ്ങളായി പ്രഖ്യാപിച്ചതിന്‍റെ പശ്ചാത്തലത്തിലാണ് പുതിയ ഔദ്യോഗിക ഭൂപടം ഇന്ത്യ പുറത്തിറക്കിയത്. ഇതിന് പിന്നാലെ നവംബര്‍ ആറിന് വിദ്യാര്‍ഥി സംഘടന പ്രക്ഷോഭം ആരംഭിച്ചിരുന്നു.