കുൽഭൂഷൺ ജാദവിന് വധശിക്ഷ വിധിച്ച പാക് സൈനിക കോടതി വിധിയും കോടതി നടപടികളും വിയന്നാ കരാറിന്‍റെ ലംഘനമാണെന്ന് ചൂണ്ടിക്കാട്ടിയായിരുന്നു അന്താരാഷ്ട്ര നീതി ന്യായക്കോടതിയില്‍ ഇന്ത്യക്കായി ഹരീഷ് സാല്‍വെ വാദിച്ചത്. വിയന്നാ കരാറിന്‍റെ 36ാം അനുശ്ചേദം സമാനമായ കേസുകളിലും കോണ്‍സുലര്‍ സഹായം നിഷ്കര്‍ഷിക്കുന്നുണ്ട്. പിന്നെന്തുകൊണ്ട് കുല്‍ഭൂഷണ് ആ അവകാശം നിഷേധിച്ചുവെന്ന് പാകിസ്ഥാന് വ്യക്തമാക്കണം. കോണ്‍സുലര്‍ സഹായം നല്‍കാന്‍ മൂന്ന് മാസത്തോളം വൈകിയത് കരാറിന്‍റെ നഗ്നമായ ലംഘനമാണ്. സാധ്യമായ എല്ലാ അന്താരാഷ്ട്ര നിയമങ്ങളുടെയും ലംഘനം നടന്നിട്ടുള്ള കേസില്‍ പാക് സൈനിക കോടതി വിധിച്ച വധശിക്ഷ റദ്ദാക്കണമെന്നും ഇന്ത്യ ആവശ്യപ്പെട്ടു.
ചാരവൃത്തി ആരോപിച്ച് പാകിസ്ഥാൻ കസ്റ്റഡിയിൽ എടുത്ത കുൽഭൂഷണിന്‍റെ അറസ്റ്റ് ദിനം എന്നാണെന്ന് രേഖപ്പെടുത്തിയിട്ടില്ല. അറസ്റ്റ് വിവരം ഇന്ത്യയെ അറിയിച്ചില്ല. വിചാരണരേഖ കൈമാറാത്തതും കോടതിയിൽ സാൽവെ ചൂണ്ടിക്കാട്ടി. കുൽഭൂഷൺ കേസിൽ ഇന്ത്യൻ ഉദ്യോഗസ്ഥർക്ക് കൂടിക്കാഴ്ചക്കുള്ള അനുമതി നിഷേധിച്ചു. ചുമത്തിയ കുറ്റകൃത്യങ്ങളും എന്തൊക്കെയാണെന്ന് വ്യക്തമാക്കാൻ പാകിസ്ഥാൻ തയ്യാറായില്ലെന്നും ഇന്ത്യ വാദിച്ചു.