വാഷിങ്ടണ്‍: കൊവിഡ് വാക്‌സിന്‍ കയറ്റുമതി പുനഃരാരംഭിക്കാൻ ഇന്ത്യയ്‌ക്ക്‌മേല്‍ യുഎസ് സമ്മർദം ചെലുത്തുന്നുവെന്ന് ഉറവിടങ്ങളെ ഉദ്ധരിച്ച് ആക്‌സിയോസ് റിപ്പോർട്ട് ചെയ്തു. വാക്‌സിന്‍ കയറ്റുമതിക്ക് ഇന്ത്യ തയ്യാറായാല്‍ ന്യൂയോര്‍ക്കില്‍ നടക്കുന്ന കൊവിഡ് -19 ആഗോള ഉച്ചകോടിയിൽ പ്രധാനമന്ത്രി നരേന്ദ്ര മോദിക്ക് ഉയര്‍ന്ന സ്ഥാനം നല്‍കാന്‍ ബൈഡൻ ഭരണകൂടം പദ്ധതിയിടുന്നതായാണ് റിപ്പോര്‍ട്ടില്‍ പറയുന്നത്.
വാക്‌സിന്‍ കയറ്റുമതിയുമായി ബന്ധപ്പെട്ട ചര്‍ച്ചകള്‍ നടക്കുന്നുണ്ടെന്ന് ഒരു അഡ്മിനിസ്ട്രേഷൻ ഉദ്യോഗസ്ഥൻ സമ്മതിച്ചുവെങ്കിലും, കൊവിഡ് -19 ആഗോള ഉച്ചകോടിയിൽ മോദിക്ക് ഉയര്‍ന്ന സ്ഥാനം നല്‍കുന്നത് സംബന്ധിച്ച വിവരങ്ങളെ അദ്ദേഹം നിഷേധിച്ചു.
''വാക്‌സിന്‍ വിതരണത്തെക്കുറിച്ച് ചർച്ച ചെയ്യാനും കയറ്റുമതി സംബന്ധിച്ചുള്ള സമയക്രമങ്ങളറിയാനും ഇന്ത്യാ ഗവണ്‍മെന്‍റുമായി നിരന്തരം ഉഭയകക്ഷി ചര്‍ച്ചകള്‍ നടക്കുന്നുണ്ട്. എന്നാല്‍ ഈ സംഭാഷണങ്ങൾ ഒരു പ്രത്യേക ഉച്ചകോടിയുമായോ, ഇടപെടലുകളുമായോ ബന്ധപ്പെട്ടിട്ടില്ല " പേരുവെളിപ്പെടുത്താനാവാത്ത ഉദ്യോഗസ്ഥന്‍ പ്രതികരിച്ചു.