വാഷിങ്ടണ്‍: ഏഴ് മാസത്തെ യാത്രക്ക് ശേഷം പെർസിവറന്‍സ് റോവർ ചൊവ്വയുടെ ഉപരിതലത്തില്‍ ഇറങ്ങി. റോവറും ചൊവ്വയുടെ ആകാശത്ത് ആദ്യമായി പറത്താന്‍ ഉദ്ദേശിച്ചിട്ടുള്ള ഹെലികോപ്‌റ്ററും അടങ്ങുന്നതാണ് പെര്‍സിവറന്‍സ് റോവര്‍. നാസ ചൊവ്വയിലേക്ക് അയച്ച ഏറ്റവും വലിയതും ഭാരം കൂടിയതും ആധുനികവുമായ വാഹനം കൂടിയാണിത്. വടക്കൻ മേഖലയിലുള്ള ജസീറോ ക്രേറ്ററിലാണ്‌ റോവർ ഇറങ്ങിയത്.
ചൊവ്വയുടെ അന്തരീക്ഷത്തില്‍ പ്രവേശിക്കുന്നത് മുതല്‍ ഉപരിതലം തൊടുന്നത് വരെയുള്ള ഘട്ടം കഠിനവും നിര്‍ണായകമായിരുന്നു. ചൊവ്വയില്‍ കാര്‍ബണ്‍ഡയോക്‌സൈഡില്‍ നിന്നും ഓക്‌സിജന്‍ ഉത്‌പാദിപ്പിക്കാനുള്ള ഉപകരണം, ആന്തരിക ഗ്രഹ ഘടനയെ പറ്റി വിവരം നല്‍കുന്ന ഉപകരണം, ക്യാമറകള്‍, കാലാവസ്ഥ വിലയിരുത്തുന്ന ഉപകരണം, സാംപിളുകളുടെയും മണ്ണിന്‍റെയും ഘടന നിര്‍ണയിക്കാനുള്ള ഉപകരണങ്ങള്‍ എന്നിവ പെര്‍സവറിന്‍റെ ഭാഗമാണ്. കഴിഞ്ഞ വര്‍ഷം ജൂലൈ 30നാണ് പെര്‍സിവറന്‍സ് ഭൂമിയില്‍ നിന്നും യാത്ര തിരിച്ചത്. ചൊവ്വയിലെ ജീവന്‍റെ സാന്നിധ്യം അന്വേഷിക്കുകയാണ് ദൗത്യത്തിന്‍റെ പ്രധാന ലക്ഷ്യം. വടക്കൻ മേഖലയിലുള്ള ജസീറോ ക്രേറ്ററിലാണ്‌ റോവർ ഇറങ്ങിയത്.
സ്കൈ ക്രേന്‍ മാനുവർ എന്ന സൂപ്പർ സോണിക്ക് പാരച്യൂട്ടിന്‍റെയും പ്രൊട്ടക്റ്റീവ് ഏരോഷെല്ലിന്‍റെയും സഹായത്തോടയാണ് റോവർ ചൊവ്വയുടെ പ്രതലത്തിലിറങ്ങിയത്. പ്രതലത്തിലേക്ക് പ്രവേശിക്കുന്ന സമയത്ത് 1,300ഡിഗ്രി സെല്‍ഷ്യസ് വരെയായിരുന്നു റോവറിന്‍റെ താപനില. താപനില വർധിച്ചപ്പോള്‍ റോവറിന് ഏരോഷെല്ല് സംരക്ഷണം നല്‍കി. തുടർന്ന് സ്കൈ ക്രേന്‍ മാനുവർ എന്ന സൂപ്പർ സോണിക്ക് പാരച്യൂട്ടിന്‍റെ സഹായത്തോടെ റോവർ ചൊവ്വയുടെ പ്രതലത്തിലിറങ്ങി.