ബ്രസീലിൽ പ്രസിഡന്‍റിനെതിരെ പ്രതിഷേധം; ഇംപീച്ച് ചെയ്യണമെന്ന് ആവശ്യം

സെപ്റ്റംബർ 7ലെ പ്രസിഡന്‍റിന്‍റെ റാലിയും തുടർന്ന് രാജ്യത്തെ ഭരണഘടന പ്രതിസന്ധിയിലേക്ക് തള്ളിവിടുമെന്ന സുപ്രീം കോടതിയോടുള്ള ഭീഷണിയെയും തുടർന്നാണ് പ്രതിഷേധങ്ങൾക്ക് ആക്കം കൂടിയത്.

ബ്രസീലിയ: ബ്രസീൽ പ്രസിഡന്‍റ് ജെയർ ബോൾസൊനാരോയെ ഇംപീച്ച് ചെയ്യണമെന്ന ആവശ്യവുമായി തെരുവുകളിൽ പ്രതിഷേധ പ്രകടനം. 19ഓളം സംസ്ഥാനങ്ങളിൽ നടന്ന പ്രതിഷേധ പ്രകടനങ്ങളിൽ രാഷ്ട്രീയ പാർട്ടികളുടെ നിർദേശ പ്രകാരം പ്രതിഷേധക്കാർ വെള്ള വസ്ത്രം ധരിച്ചുകൊണ്ടാണ് പങ്കെടുത്തത്. പ്രതിഷേധ പ്രകടനത്തിൽ ഇടതുപക്ഷ രാഷ്ട്രീയ പാർട്ടികളുടെ അഭാവം പ്രകടമായിരുന്നു.

കൊവിഡ് വ്യാപനം നിയന്ത്രിക്കുന്നതിലെ പരാജയം, ഭക്ഷണം, വൈദ്യുതി എന്നിവയുൾപ്പെടെയുള്ളതിലെ വിലക്കയറ്റം എന്നിവയ്ക്കെതിരെ സർക്കാരിനെ ലക്ഷ്യം വച്ചുകൊണ്ടാണ് ഞായറാഴ്‌ച ബ്രസീലിയൻ തെരുവുകളിൽ പ്രതിഷേധക്കാർ ഒത്തുകൂടിയത്. സെപ്റ്റംബർ 7ലെ പ്രസിഡന്‍റിന്‍റെ റാലിയും തുടർന്ന് രാജ്യത്തെ ഭരണഘടന പ്രതിസന്ധിയിലേക്ക് തള്ളിവിടുമെന്ന സുപ്രീം കോടതിയോടുള്ള ഭീഷണിയെയും തുടർന്നാണ് പ്രതിഷേധങ്ങൾക്ക് ആക്കം കൂടിയത്.

ഇംപീച്ച്മെന്‍റിന് പ്രേരിപ്പിക്കണമോ എന്ന് തീരുമാനിക്കുന്നതിൽ ഞായറാഴ്‌ചത്തെ പ്രകടനങ്ങളിലെ പോളിങ്ങിന് നിർണായകമായ സ്ഥാനമാണുള്ളത്. ജെയർ ബോൾസൊനാരോയുടെ ജനസമ്മിതി വർഷാവർഷം കുറഞ്ഞുവരികയാണെങ്കിലും ഇംപീച്ച് ചെയ്ത് പുറത്താക്കപ്പെട്ട ദിൽമ റൂസഫ് ഉൾപ്പെടെയുള്ള മുൻ പ്രസിഡന്‍റുമാരേക്കാൾ ബോൾസൊനാരോ ജനപ്രിയനാണ്.

ബോൾസൊനാരെയെ എതിർത്ത് സുപ്രീം കോടതി ചീഫ് ജസ്റ്റിസ്

2022ൽ വരാനിരിക്കുന്ന തെരഞ്ഞെടുപ്പിലും ബോൾസൊനാരോ അധികാരം നേടാൻ വളരെ വലിയ സാധ്യതയാണുള്ളത്. ഈ ആഴ്ച ആദ്യം ബോൾസൊനാരോ അനുകൂലികൾ നടത്തിയ പ്രകടനങ്ങളും അത്തരമൊരു നിഗമനത്തിലേക്കാണ് വിരൽ ചൂണ്ടുന്നത്.

സാവോപോളോയിലും തലസ്ഥാനമായ ബ്രസീലിയയിലും നടന്ന പ്രകടനത്തിൽ വൻ സ്വീകാര്യതയാണ് പ്രസിഡന്‍റിന് ലഭിച്ചത്. അടുത്ത വർഷം രാജ്യത്തെ തെരഞ്ഞെടുപ്പ് ട്രിബ്യൂണലിന്‍റെ അധ്യക്ഷ സ്ഥാനം ഏറ്റെടുക്കുന്ന ജസ്റ്റിസ് അലക്സാണ്ടർ മൊറേസിന്‍റെ വിധി അനുസരിക്കില്ലെന്ന് പ്രകടനത്തിൽ പ്രസിഡന്‍റ് പ്രഖ്യാപിച്ചിരുന്നു.

എന്നാൽ സുപ്രീം കോടതി ചീഫ് ജസ്റ്റിസ് ഉൾപ്പെടെയുള്ളവർ അദ്ദേഹത്തിന്‍റെ അഭിപ്രായങ്ങൾ ജനാധിപത്യ വിരുദ്ധമാണെന്ന് പറഞ്ഞ് രംഗത്ത് വന്നിരുന്നു. ജുഡീഷ്യൽ തീരുമാനങ്ങൾ അംഗീകരിക്കാതിരിക്കുകയോ അതിന് മറ്റുള്ളവരെ പ്രോത്സാഹിപ്പിക്കുകയോ ചെയ്യുന്നത് ഇംപീച്ച് ചെയ്യപ്പെടേണ്ട കുറ്റമാണെന്ന് ചീഫ് ജസ്റ്റിസ് ലൂയിസ് ഫക്സ് പറഞ്ഞു. ബോൾസൊനാരോ പ്രസിഡന്‍റ് സ്ഥാനം ഏറ്റെടുത്തത് മുതൽ 130 ഇംപീച്ച്‌മെന്‍റ് അപേക്ഷകൾ ഇതുവരെ ലഭിച്ചിട്ടുണ്ട്.