ലാഗോസ്:ലാഗോസിൽ കെട്ടിടം തകർന്നുണ്ടായ അപകടത്തിൽ മരിച്ചവരുടെ എണ്ണം 36 ആയി. ബുധനാഴ്‌ച ഉച്ചയ്ക്ക് ശേഷം 15 മൃതദേഹങ്ങൾ കൂടി കണ്ടെടുത്തതോടെയാണ് അപകടത്തിൽ മരിച്ചവരുടെ എണ്ണം 36ലേക്ക് ഉയർന്നത്. തിങ്കളാഴ്‌ചയാണ് നൈജീരിയയിലെ ഏറ്റവും ജനസാന്ദ്രത കൂടിയ നഗരമായ ലാഗോസിൽ നിർമാണത്തിലിരുന്ന 21 നില കെട്ടിടം തകർന്നുവീണത്. സംഭവസമയത്ത് നിർമാണ തൊഴിലാളികളും കരകൗശല തൊഴിലാളികളും സ്ഥലത്തുണ്ടായിരുന്നു.
കെട്ടിടാവശിഷ്ടങ്ങൾക്കിയിൽ എത്ര പേർ കുടുങ്ങിക്കിടക്കുന്നുവെന്ന് ഇനിയും സ്ഥിരീകരിച്ചിട്ടില്ല. അപകട സമയത്ത് ഏകദേശം 100 പേർ സ്ഥലത്തുണ്ടായിരുന്നുവെന്നാണ് സ്ഥലത്തെ നിർമാണ തൊഴിലാളിയുടെ കണക്കുകൂട്ടൽ. അതുപ്രകാരം 55 പേരെ ഇനിയും കണ്ടെത്താനുണ്ടെന്ന് രക്ഷാപ്രവർത്തകർ പറയുന്നു.