ഹൈദരാബാദ്‌: അറ്റ്‌ലി സംവിധാനം ചെയ്യുന്ന ഷാരൂഖ് ഖാന്‍ ചിത്രം ജവാനിലെ തകർപ്പൻ ഗാനരംഗം പുറത്ത്. ചിത്രത്തിന്‍റെ ട്രെയിലർ ദുബായിൽ റിലിസ്‌ ചെയ്യാനിരിക്കെയാണ് 'ജസ്റ്റ് ഡാൻസ്‌ വിത്ത്‌ മി' എന്ന ഹാഷ്‌ ടാഗോടെ എക്‌സിൽ (ട്വിറ്റർ) ജവാനിലെ പുതിയ ഗാനരംഗം വന്നത്. യുവ സംഗീത സംവിധായകൻ അനിരുദ്ധ് രവിചന്ദർ ഒരുക്കിയ ഗാനത്തിൽ കിങ്‌ ഖാനെപ്പം തമിഴ്‌ ലേഡി സൂപ്പർ സ്റ്റാർ നയൻതാരയും ചുവടു വയ്‌ക്കുന്നു.
ഗാനരംഗത്തിന്‍റെ അവസാനത്തിൽ ഓഗസ്റ്റ് 31ന് ചിത്രത്തിന്‍റെ ട്രെയിലർ പുറത്തു വിടുമെന്ന് ഷാരുഖ്‌ ഔദ്യോഗിക പ്രഖ്യാപനം നടത്തിയിട്ടുണ്ട്‌. ജവാൻ ചിത്രത്തിന്‍റെതായി നിർമ്മാതാക്കൾ മുൻപ്‌ പങ്കുവച്ച രണ്ട് ഗാനരംഗങ്ങളും ആരാധകർ ഏറ്റെടുത്തിരുന്നു. മികച്ച പ്രതികരണങ്ങൾ ആണ് ആരാധകരിൽ നിന്നും ഈ ഗാനങ്ങൾക്ക് ഇതുവരെ ലഭിച്ചത്‌.