ഹൈദരാബാദ്:അപകട വാര്‍ത്തയ്‌ക്ക് പിന്നാലെ പ്രതികരിച്ച് 'ദി കേരള സ്‌റ്റോറി' നായിക ആദ ശര്‍മ. അപകടം ഗുരുതരമല്ലെന്നും വിവരമറിഞ്ഞ് അന്വേഷണവുമായെത്തിയവര്‍ക്ക് നന്ദിയറിയിച്ചും സമൂഹമാധ്യമമായ ട്വിറ്ററിലൂടെയാണ് താരം പ്രതികരിച്ചത്. ഏറെ വിവാദങ്ങള്‍ക്ക് വഴിവച്ച കേരള സ്‌റ്റോറി ബോക്‌സോഫിസുകളില്‍ പ്രദര്‍ശനം തുടരവെയാണ് ചിത്രത്തിലെ കേന്ദ്ര കഥാപാത്രമായ ആദ ശര്‍മയ്‌ക്കും സംവിധായകന്‍ സുദിപ്‌തോ സെന്നിനും വാഹനാപകടം സംഭവിച്ചുവെന്ന റിപ്പോര്‍ട്ടുകളെത്തുന്നത്.
പ്രതികരിച്ച് ആദ ശര്‍മ:സുഹൃത്തുക്കളെ ഞാന്‍ സുഖമായിരിക്കുന്നു. ഞങ്ങള്‍ അപകടത്തില്‍പെട്ടുവെന്ന വാര്‍ത്തകള്‍ പ്രചരിച്ചതോടെ ധാരാളം പേരുടെ സന്ദേശങ്ങളെത്തുന്നുണ്ട്. ടീം മുഴുവനായും ഞങ്ങൾ എല്ലാവരും സുഖമായിരിക്കുന്നു. ഗുരുതരമായി ഒന്നുംതന്നെയില്ല. നിങ്ങളുടെ കരുതലിന് നന്ദി എന്ന് ആദ ശര്‍മ ട്വിറ്ററില്‍ കുറിച്ചു.
അതേസമയം ഹിന്ദു ഏകതാ യാത്രയിൽ പങ്കെടുക്കുന്നതിനായി കേരള സ്‌റ്റോറി അണിയറ സംഘം തെലങ്കാനയിലെ കരിംനഗറിലേക്ക് യാത്രയ്‌ക്ക് തയ്യാറെടുക്കുന്നതിനിടെയാണ് അപകടം. അതുകൊണ്ടുതന്നെ ഇതിന് പ്രാധാന്യം നല്‍കി കൊണ്ടായിരുന്നു സംവിധായകന്‍ സുദിപ്‌തോ സെന്നിന്‍റെ പ്രതികരണം. ‘മെഡിക്കൽ എമർജൻസി’ കാരണമാണ് തങ്ങൾക്ക് പരിപാടിയിൽ പങ്കെടുക്കാൻ സാധിക്കാതിരുന്നതെന്നും അദ്ദേഹം അറിയിച്ചു.
നന്ദിയറിയിച്ച് സംവിധായകന്‍:ഞങ്ങളുടെ ആരോഗ്യത്തെക്കുറിച്ചുള്ള നിങ്ങളുടെ കരുതലുകള്‍ക്ക് ഒരുപാട് നന്ദിയുണ്ട്. നിങ്ങളുടെ കോളുകളും ഊഷ്‌മള സന്ദേശങ്ങളും കൊണ്ട് ഞങ്ങള്‍ സന്തുഷ്‌ടരാണ്. ഒന്നേ പറയാനുള്ളു- ഞങ്ങള്‍ ഇപ്പോള്‍ സുഖമായിരിക്കുന്നു. ഉടന്‍ തന്നെ ഞങ്ങളുടെ പ്രൊമോഷന്‍ പരിപാടികള്‍ പുനരാരംഭിക്കും. ഞങ്ങളോടുള്ള സ്‌നേഹവും പിന്തുണയും തുടരുക എന്ന് സുദിപ്‌തോ സെന്‍ ട്വീറ്റില്‍ വ്യക്തമാക്കി.