'പ്രിയന്‍ ഓട്ടത്തിലാണ്' എന്ന ഹിറ്റ് ചിത്രത്തിന് ശേഷം വൗ സിനിമാസിന്‍റെ (WOW Cinemas) ബാനറില്‍ സന്തോഷ് ത്രിവിക്രമന്‍ (Santhosh Thrivikraman) നിർമിക്കുന്ന 'കുഞ്ഞമ്മിണീസ് ഹോസ്‌പിറ്റൽ' സിനിമയുടെ ട്രെയിലർ പുറത്ത് (Kunjamminis Hospital Official Trailer). ഇന്ദ്രജിത്ത് സുകുമാരന്‍ (Indrajith Sukumaran) നായകനായി എത്തുന്ന ചിത്രത്തിലെ ഏറെ കൗതുകം ഉണർത്തുന്ന ട്രെയിലറാണ് അണിയറ പ്രവർത്തകർ പുറത്തുവിട്ടത്. മരിച്ചിട്ടും ഭൂമി വിട്ടുപോകാത്തവരുടെ കഥയാണ് ചിത്രം പറയുന്നതെന്ന സൂചനയാണ് ട്രെയിലർ മുന്നോട്ട് വയ്‌ക്കുന്നത്.
നവാഗതനായ സനല്‍ വി ദേവന്‍ (Sanal Devan) ആണ് ചിത്രം സംവിധാനം ചെയ്യുന്നത്. ഒരു ഫാന്‍റസി ചിത്രമായി അണിയിച്ചൊരുക്കിയിരിക്കുന്ന ചിത്രത്തില്‍ കോമഡിക്കും ഏറെ പ്രാധാന്യമുണ്ടെന്ന് ട്രെയിലറിൽ നിന്നും വ്യക്തമാണ്. ഈ മാസം 28ന് (ജൂലൈ 28) ചിത്രം തിയേറ്ററുകളിൽ എത്തും.
ഇന്ദ്രജിത്തിന് പുറമെ ബാബുരാജ് (Babu Raj), നൈല ഉഷ (Nyla Usha), സരയു മോഹൻ (Sarayu Mohan) എന്നിവരാണ് ചിത്രത്തിൽ പ്രധാന കഥാപാത്രങ്ങളായി എത്തുന്നത്. തെന്നിന്ത്യൻ താരം പ്രകാശ് രാജും (Prakash Raj) ചിത്രത്തില്‍ ശ്രദ്ധേയ വേഷത്തിലുണ്ട്. വേറിട്ട ലുക്കിലാണ് താരം എത്തുന്നത്. കൂടാതെ ഹരിശ്രീ അശോകന്‍, മല്ലിക സുകുമാരന്‍, ബിനു പപ്പു, ബിജു സോപാനം, ജെയിംസ് ഏലിയ, സുധീര്‍ പറവൂര്‍, ശരത്, പ്രശാന്ത് അലക്‌സാണ്ടര്‍, ഉണ്ണി രാജ, അല്‍ത്താഫ് മനാഫ്, ഗംഗ മീര, തുടങ്ങിയവരും ചിത്രത്തില്‍ അണിനിരക്കുന്നു.