80-ാമത് ഗോള്‍ഡന്‍ ഗ്ലോബ് പുരസ്‌കാര വേദിയില്‍ തിളങ്ങിയ എസ് എസ് രാജമൗലിയുടെ 'ആര്‍ആര്‍ആറി'ന് അഭിനന്ദനപ്രവാഹം. 'ആര്‍ആര്‍ആറി'ന്‍റെ ഈ പുരസ്‌കാര നേട്ടം ഇന്ത്യയൊട്ടാകെ ആഘോഷമാക്കി മാറ്റിയിരിക്കുകയാണ്. ഇപ്പോഴിതാ ചരിത്ര വിജയത്തെ അഭിനന്ദിച്ച് കിംഗ് ഖാന്‍ ഷാരൂഖ് ഖാനും രംഗത്തെത്തിയിരിക്കുകയാണ്.
ട്വിറ്ററിലൂടെയാണ് താരം അഭിനന്ദനം അറിയിച്ചിരിക്കുന്നത്. 'ഗോള്‍ഡന്‍ ഗ്ലോബ് നേടിയ താങ്കളുടെ 'നാട്ടു നാട്ടു' എന്ന ഗാനത്തിന് ചുവടുവച്ചാണ് ഇന്ന് ഉറക്കമെഴുന്നേറ്റത്. ഇനിയും പുരസ്‌കാരങ്ങള്‍ നേടി ഇന്ത്യയ്‌ക്ക് കൂടുതല്‍ അഭിമാനകരമാകട്ടെ' -ഷാരൂഖ് ഖാന്‍ കുറിച്ചു.
നേരത്തെ ഷാരൂഖിന്‍റെ 'പത്താന്‍' ട്രെയിലറിനെ പുകഴ്‌ത്തി എസ് എസ് രാജമൗലിയും രംഗത്തെത്തിയിരുന്നു. 'ട്രെയിലര്‍ മികച്ചതാണെന്ന് തോന്നുന്നു. രാജാവ് മടങ്ങിയെത്തുന്നു!!! 'പത്താന്‍' മുഴുവന്‍ ടീമിനും ആശംസകള്‍'-രാജമൗലി ട്വീറ്റ് ചെയ്‌തു. നിരവധി ഹാര്‍ട്ട് ഇമോജികള്‍ക്കൊപ്പമായിരുന്നു ട്വീറ്റ്. തൊട്ടുപിന്നാലെ എസ് എസ് രാജമൗലിയുടെ ട്വീറ്റിന് ഷാരൂഖ് നന്ദി അറിയിച്ചു. ഇപ്പോള്‍ 'ആര്‍ആര്‍ആറി'ന്‍റെ ഗോള്‍ഡന്‍ ഗ്ലോബ് വിജയത്തെ അഭിനന്ദിക്കാനും താരം മറന്നില്ല.
'ആര്‍ആര്‍ആറില്‍' സുപ്രധാന വേഷത്തിലെത്തിയ അജയ്‌ ദേവ്‌ഗണും പുരസ്‌കാര നേട്ടത്തില്‍ സിനിമയുടെ ടീമിന് ആശംസകള്‍ അറിയിച്ചു. 'കീരവാണി, രാജമൗലി, തുടങ്ങി 'ആര്‍ആര്‍ആര്‍' ടീമിന് ഹൃദയം നിറഞ്ഞ ആശംസകള്‍'-അജയ്‌ ദേവ്‌ഗണ്‍ കുറിച്ചു.