വിഷ്‌ണു ഉണ്ണികൃഷ്‌ണന്‍-ബിബിന്‍ ജോര്‍ജ് കൂട്ടുകെട്ട് ആദ്യമായി സംവിധാനം ചെയ്‌ത വെടിക്കെട്ട് സിനിമയുടെ ട്രെയിലര്‍ പുറത്തിറങ്ങി. നാടന്‍ പശ്ചാത്തലത്തിലുളള കഥ പറയുന്ന ചിത്രത്തിന്‍റെ ട്രെയിലറില്‍ വിഷ്‌ണുവും ബിബിനും തന്നെയാണ് മുഖ്യ ആകര്‍ഷണം. കറുംങ്കോട്ട, മഞ്ഞപ്ര എന്നിങ്ങനെ അടുത്തടുത്തുളള രണ്ട് നാട്ടിലെ ചെറുപ്പക്കാര്‍ തമ്മിലുളള അടിയും തിരിച്ചടിയും വെല്ലുവിളികളുമാണ് ട്രെയിലറില്‍ കാണിക്കുന്നത്.
ചായക്കടകാരനായി ബിബിന്‍ ജോര്‍ജ് എത്തുന്ന ചിത്രത്തില്‍ തല പറ്റയടിച്ച് താടി വളര്‍ത്തി പുതിയ മേക്കോവറിലാണ് വിഷ്‌ണു ഉണ്ണികൃഷ്‌ണന്‍ പ്രത്യക്ഷപ്പെടുന്നത്. ഇരുനൂറോളം പുതുമുഖ താരങ്ങള്‍ അണിനിരക്കുന്ന ചിത്രത്തില്‍ ഐശ്വര്യ അനില്‍കുമാര്‍, ശ്രദ്ധ ജോസഫ് എന്നിവരാണ് നായികമാര്‍. സംവിധാനത്തിന് പുറമെ സിനിമയ്‌ക്ക് രചന നിര്‍വഹിച്ചിരിക്കുന്നതും വിഷ്‌ണു-ബിബിന്‍ കൂട്ടുകെട്ട് തന്നെയാണ്.