ഓണക്കാലത്ത് തിയേറ്ററുകളിൽ കുടുംബസമേതം കാണാൻ 'വാതിൽ' (Vaathil) എത്തുന്നു. വിനയ് ഫോര്‍ട്ട് (Vinay Fort), അനു സിത്താര (Anu Sithara), കൃഷ്‌ണ ശങ്കര്‍ (Krishna Shankar), മെറിൻ ഫിലിപ്പ് എന്നിവർ പ്രധാന കഥാപാത്രങ്ങളെ അവതരിപ്പിക്കുന്ന ചിത്രം ഓണം റിലീസായി ഓഗസ്റ്റ് 31 ന് തിയേറ്ററുകളിലെത്തും. ഇപ്പോഴിതാ ചിത്രത്തിന്‍റെ കാത്തിരിപ്പ് ഉയർത്തി രണ്ടാമത്തെ ടീസറും എത്തിയിരിക്കുകയാണ് (Vaathil Official Teaser 2).
സര്‍ജു രമാകാന്ത് (Sarju Remakanth) ആണ് 'വാതില്‍' സംവിധാനം ചെയ്യുന്നത്. സ്‌പാര്‍ക്ക് പിക്ച്ചേഴ്‌സിന്‍റെ ബാനറില്‍ സുജി കെ ഗോവിന്ദ് രാജ് നിർമിക്കുന്ന ഈ ചിത്രം സിനി ലൈൻ എന്‍റർടൈൻമെന്‍റ് ആണ് തിയേറ്ററുകളിൽ പ്രദർശനത്തിനായി എത്തിക്കുന്നത്. രജീഷ് വാളാഞ്ചേരി സഹ നിർമാതാവും അനുപ് കാരാട്ട് വെള്ളാട്ട്, റിയാസ് അടക്കണ്ടി എന്നിവർ എക്‌സിക്യൂട്ടീവ് പ്രൊഡ്യൂസറുമാണ്.
സുനില്‍ സുഖദ, ഉണ്ണിരാജ്, അബിന്‍ ബിനോ, വി കെ ബെെജു, അഞ്ജലി നായര്‍, സ്‌മിനു തുടങ്ങിയ താരങ്ങളാണ് ചിത്രത്തിൽ മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ഷംനാദ് ഷബീര്‍ തിരക്കഥയും സംഭാഷണുവും എഴുതുന്ന ഈ ചിത്രത്തിന്‍റെ ഛായാഗ്രഹണം നിര്‍വഹിക്കുന്നത് മനേഷ് മാധവന്‍ ആണ്. വിനായക് ശശികുമാർ, സെജോ ജോൺ എന്നിവരുടെ വരികള്‍ക്ക് സെജോ ജോണ്‍ ഈണം പകരുന്നു. ജോണ്‍ക്കുട്ടിയാണ് ചിത്രത്തിന്‍റെ എഡിറ്റര്‍.
അടുത്തിടെയാണ് ചിത്രത്തിലെ 'ജീവിതമെന്ന തമാശ' (Jeevithamenna Thamaasha), 'കനിവേ എവിടെ' (Kanive Evide) എന്നീ ഗാനങ്ങള്‍ പുറത്തിറങ്ങിയത്. ഇരുഗാനങ്ങളും പ്രേക്ഷക ശ്രദ്ധയും നേടിയിരുന്നു. ഇപ്പോഴിതാ പുതിയ ടീസറും കയ്യടി നേടുകയാണ്.