ദളപതി ആരാധകര്‍ നാളേറെയായി അക്ഷമരായി കാത്തിരിക്കുന്ന ചിത്രമാണ് 'വാരിസ്'. സിനിമയുടെ സെന്‍സറിങ്‌ പൂര്‍ത്തിയായി. 'വാരിസി'ന് ക്ലീന്‍ യു സര്‍ട്ടിഫിക്കറ്റ് ആണ് ലഭിച്ചിരിക്കുന്നത്. 'വാരിസ്' ടീം തന്നെയാണ് ഇക്കാര്യം അറിയിച്ചിരിക്കുന്നത്.
അതേസമയം 'വാരിസ്' ട്രെയിലര്‍ ഇന്ന് അഞ്ച് മണിക്ക് റിലീസ് ചെയ്യുമെന്നും അണിയറപ്രവര്‍ത്തകര്‍ അറിയിച്ചിട്ടുണ്ട്. 'ബോസ്‌ മടങ്ങി വരുന്നു' (ദി ബോസ്‌ റിട്ടേണ്‍സ്‌) എന്ന ടാഗ്‌ലൈനോട് കൂടിയാണ് ചിത്രം പുറത്തിറങ്ങുക. വംശി പൈടിപ്പിള്ളിയാണ് സിനിമയുടെ സംവിധാനം.
വിജയ്‌യുടെ 66ാമത്തെ ചിത്രം കൂടിയാണ് 'വാരിസ്'. വിജയ് രാജേന്ദ്രന്‍ എന്ന കഥാപാത്രത്തെയാണ് ചിത്രത്തില്‍ താരം അവതരിപ്പിക്കുന്നത്. വളര്‍ത്തച്ഛന്‍റെ മരണത്തെ തുടര്‍ന്ന് കോടിക്കണക്കിന് ഡോളര്‍ ബിസിനസ് സാമ്രാജ്യത്തിന് ഉടമയാകുന്ന കഥാപാത്രമാണ് താരത്തിന്‍റേത്. ശരത്‌ കുമാര്‍ ആണ് സിനിമയില്‍ വിജയ്‌യുടെ അച്ഛനായെത്തുന്നത്.