ഹൈദരാബാദ്: ഗോസിപ്പുകള്‍ക്ക് ഇടയിലും അവധിക്കാലം ആഘോഷിക്കാനായി വിജയ് ദേവരകൊണ്ടയും രശ്‌മിക മന്ദാനയും മാലിദ്വീപിലേക്ക്. അവധിക്കാല പറുദീസയിലേക്ക് പുറപ്പെട്ട പ്രണയ ജോഡികളെ മുംബൈ വിമാനത്താവളത്തിൽ കണ്ടതായി പാപ്പരാസികള്‍ റിപ്പോര്‍ട്ട് ചെയ്‌തു. വിജയും രശ്‌മികയും തമ്മില്‍ പ്രണയത്തിലാണെന്നും ഡേറ്റിങ്ങിലാണെന്നും വാര്‍ത്തകള്‍ പ്രചരിക്കുന്ന സാഹചര്യത്തില്‍ ഇരുവരും ഒന്നിച്ച് മാലിദ്വീപിലേക്ക് പുറപ്പെട്ടത് വാര്‍ത്തകള്‍ ശരിയാണെന്ന് തെളിയിക്കുന്നതായാണ് പാപ്പരാസികളുടെ റിപ്പോര്‍ട്ട്.
2018-ൽ പുറത്തിറങ്ങിയ ഗീതഗോവിന്ദം എന്ന തെലുഗു ചിത്രത്തില്‍ നായിക നായകന്‍മാരായി പ്രത്യക്ഷപ്പെട്ടതു മുതല്‍ വിജയ് ദേവരകൊണ്ടയും രശ്‌മിക മന്ദാനയും ഡേറ്റിങ്ങിലാണെന്ന തരത്തില്‍ വാര്‍ത്തകള്‍ പ്രചരിച്ചിരുന്നു. എന്നാല്‍ താരങ്ങള്‍ ഇത്തരം വാര്‍ത്തകളെ തള്ളുകയാണ് ഉണ്ടായത്. ഇരുവരുടെയും ബന്ധത്തെ കുറിച്ച് ചോദിക്കുമ്പോഴെല്ലാം തങ്ങള്‍ നല്ല സുഹൃത്തുക്കള്‍ മാത്രമാണ് എന്നായിരുന്നു മറുപടി. അതേസമയം സെലിബ്രിറ്റികളുടെ ഏറ്റവും പ്രിയപ്പെട്ട അവധിക്കാല താവളമായ മാലിദ്വീപിലേക്ക് ഒരുമിച്ച് പോയത് താരങ്ങള്‍ തമ്മിലുള്ള ബന്ധം ഔദ്യോഗികമായി പ്രഖ്യാപിക്കാനുള്ള സൂചനയാണെന്നാണ് റിപ്പോര്‍ട്ട്.