തെലുഗു സൂപ്പര്‍താരം വിക്‌ടറി വെങ്കിടേഷിന്‍റെ 75ആം ചിത്രമായ സൈന്ധവ് റിലീസിന് ഒരുങ്ങുന്നു. നിഹാരിക എന്‍റർടെയ്‌ന്‍മെന്‍റ്‌സിന്‍റെ ബാനറിൽ വെങ്കട് ബൊയാനപ്പള്ളി നിർമിച്ച് സൈലേഷ് കോലാനുവിന്‍റെ സംവിധാനത്തിൽ ഒരുങ്ങുന്ന ചിത്രത്തിന്‍റെ പ്രൊമോഷൻസ് ഇന്നത്തെ (16-10-2023) ടീസർ റിലീസോടെ അണിയറ പ്രവർത്തകർ ആരംഭിച്ചു (Venkatesh Saindhav Movie Teaser). ടീസറിൽ രണ്ട് ദിശയിലൂടെ ആണ് സിനിമ സഞ്ചരിക്കുന്നത്. ഫാമിലി ഡ്രാമ ആയി ആരംഭിക്കുന്ന ടീസർ നവാസുദ്ദീൻ സിദ്ദിഖിയുടെ വരവോടെ ആക്ഷൻ ട്രാക്കിലേക്ക് നീങ്ങുകയാണ്.
നവാസുദ്ദീൻ സിദ്ദിഖിയുടെ കഥാപാത്രം ചിത്രത്തിൽ ഒരു ക്രൂര വില്ലനായാണ്‌ എത്തുന്നത്‌. ക്ഷമയോടെ ഇമോഷണൽ ആയിട്ടുള്ള വെങ്കിടേഷിനെ ആദ്യ ഭാഗങ്ങളിൽ കാണാമെങ്കിലും പിന്നീട് ആഗ്രസീവ് ആയ സൈക്കോ എന്ന വിളിപ്പേരുള്ള മാസ്സ് ഹീറോ ആയി കാണാം. ക്രൈം ത്രില്ലർ വിഭാഗത്തിൽ പ്പെടുന്ന ചിത്രം, സൈന്ധവിന്‍റെ ലോകത്തേക്ക് പ്രേക്ഷകനെ കൊണ്ടു പോകാൻ ഓരോ ഫ്രയിമിലും ശ്രമിക്കുകയാണ് സംവിധായകൻ.