ഹൈദരാബാദ് (തെലങ്കാന): കമൽഹാസൻ നായകനായ വിക്രം സിനിമ മോഡേൺ കൾട്ട് ക്ലാസിക് ആണെന്ന് ടോളിവുഡ് സൂപ്പർ സ്റ്റാർ മഹേഷ് ബാബു. സിനിമ കണ്ട ശേഷം ട്വിറ്ററിലാണ് താരം തന്‍റെ അഭിപ്രായം പങ്കുവച്ചത്. ഒപ്പം ചിത്രത്തിന്‍റെ സംവിധായകനെയും അഭിനേതാക്കളെയും മഹേഷ് ബാബു പ്രശംസിക്കുകയും ചെയ്‌തു.
വിക്രം സംവിധായകന്‍ ലോകേഷ് കനകരാജിനെ നേരില്‍ കണ്ട് സിനിമയെ കുറിച്ചുള്ള മുഴുവന്‍ കാര്യങ്ങളും ചര്‍ച്ച ചെയ്യാന്‍ ആഗ്രഹിക്കുന്നതായും മഹേഷ് ബാബു ട്വീറ്റ് ചെയ്‌തു. വിജയ് സേതുപതിയുടെയും ഫഹദ് ഫാസിലിന്‍റെയും പ്രകടനങ്ങൾ മികച്ചതായിരുന്നു എന്നും, അനിരുദ്ധ് തന്‍റെ എക്കാലത്തെയും മികച്ച സംഗീതമാണ് ചിത്രത്തിന് നല്‍കിയതെന്നും ട്വീറ്റിലുണ്ട്.
എന്നാല്‍ കമല്‍ഹാസനെ കുറിച്ച് തെലുങ്ക് സൂപ്പര്‍സ്റ്റാര്‍ പറഞ്ഞതിങ്ങനെയാണ്; 'മഹാനായ കമൽഹാസനെ കുറിച്ച് അഭിപ്രായം പറയാൻ എനിക്ക് യോഗ്യതയില്ല. എനിക്ക് പറയാനുള്ളത് ഇത്രമാത്രം..നിങ്ങളുടെ ഏറ്റവും വലിയ ആരാധകനെന്ന നിലയിൽ, ഇതെന്‍റെ അഭിമാന നിമിഷങ്ങളിൽ ഒന്നായിരുന്നു!! സാറിനും, അങ്ങയുടെ മികച്ച ടീമിനും എന്‍റെ അഭിനന്ദനങ്ങൾ'.