വൈദ്യുതാഘാതമേറ്റ് മൂന്നുപേർക്ക് ദാരുണാന്ത്യം ; അപകടം നടൻ യഷിന്‍റെ ജന്മദിനാഘോഷത്തിനിടെ

Electrocution in Yash's birthday : യഷിന്‍റെ കൂറ്റൻ കട്ട് ഔട്ട് സ്ഥാപിക്കുന്നതിനിടെ ഹൈ ടെൻഷൻ വൈദ്യുതി വയറിൽ നിന്നും ഷോക്കേൽക്കുകയായിരുന്നു

ഗദഗ് (കർണാടക): 'കെജിഎഫ്' താരം യഷിന്‍റെ ജന്മദിനാഘോഷത്തിനിടെ വൈദ്യുതാഘാതമേറ്റ് കർണാടകയിൽ മൂന്നുപേർക്ക് ദാരുണാന്ത്യം. കൂറ്റൻ കട്ട് ഔട്ട് സ്ഥാപിക്കുന്നതിനിടെയാണ് അതിദാരുണമായ അപകടം നടന്നത്. മൂന്ന് പേർക്ക് അപകടത്തിൽ പരിക്കേറ്റിട്ടുമുണ്ട് (Yash's birthday celebration).

കർണാടകയിലെ ഗദഗ് ജില്ലയിലെ ലക്ഷ്‌മേശ്വര്‍ പട്ടണത്തിന് സമീപമുള്ള സോറനാഗി ഗ്രാമത്തിൽ തിങ്കളാഴ്‌ച പുലർച്ചെയാണ് സംഭവം. ഹനുമന്ത ഹരിജൻ (24), മുരളി നടുമണി (20), നവീൻ ഗാജി (20) എന്നിവരാണ് മരണപ്പെട്ടത്. പരിക്കേറ്റ മഞ്ജുനാഥ് ഹരിജൻ, പ്രകാശ് മ്യാഗേരി, ദീപക് ഹരിജൻ എന്നിവർ നിലവിൽ പ്രാദേശിക ആശുപത്രിയിൽ ചികിത്സയിലാണ്.

ജനുവരി 8 ന് യഷിന്‍റെ ജന്മദിനം ഫാൻസ് അസോസിയേഷന്‍റെ നേതൃത്വത്തിൽ വിപുലമായി ആഘോഷിക്കാനിരിക്കെയാണ് ദാരുണമായ അപകടം നടന്നത്. നടനോടുള്ള ആദരസൂചകമായി കട്ട്-ഔട്ട് സ്ഥാപിക്കാൻ ഫാൻസ് അസോസിയേഷൻ തീരുമാനിച്ചിരുന്നു. തുടർന്ന് വലിയ ഫ്രെയിമിൽ ഒരുക്കിയ കട്ട്-ഔട്ട് സ്ഥാപിക്കുന്നതിനിടെയാണ് സമീപത്തെ ഹൈ ടെൻഷൻ വൈദ്യുതി വയറിൽ നിന്നും യുവാക്കൾക്ക് ഷോക്കേറ്റത്.

പരിക്കേറ്റ് ലക്ഷ്‌മേശ്വറിലെ ആശുപത്രിയിൽ ചികിത്സയിൽ കഴിയുന്നവരെ സ്ഥലം എംഎൽഎ ചന്ദ്രു ലമാനി സന്ദർശിച്ചു. മരണപ്പെട്ടവരുടെ കുടുംബങ്ങളെ അനുശോചനം അറിയിച്ച അദ്ദേഹം അതിദാരുണമായ അപകടമാണ് സംഭവിച്ചതെന്നും പറഞ്ഞു. അതേസമയം പരിക്കേറ്റവരിൽ രണ്ട് പേരുടെ നില ഗുരുതരമാണെന്ന് എസ്‌പി ബി എസ് നേമഗൗഡ് അറിയിച്ചു.

ജില്ല ചുമതലയുള്ള മന്ത്രി എച്ച്.കെ. പാട്ടീൽ ഡെപ്യൂട്ടി കമ്മീഷണർ, പൊലീസ് സൂപ്രണ്ട് എന്നിവരുമായി ബന്ധപ്പെട്ട് വിവരങ്ങൾ ശേഖരിക്കുന്നുണ്ട്. മരണപ്പെട്ടവരുടെ കുടുംബങ്ങൾക്ക് നഷ്‌ട പരിഹാരം നൽകുന്നതടക്കമുള്ള കാര്യങ്ങൾ ചർച്ച ചെയ്യാൻ മുഖ്യമന്ത്രി സിദ്ധരാമയ്യയുമായി കൂടിക്കാഴ്‌ച നടത്തുമെന്നും അദ്ദേഹം പറഞ്ഞു.

പൊട്ടിവീണ വൈദ്യുത കമ്പിയില്‍ നിന്ന് ഷോക്കേറ്റു: അടുത്തിടെയാണ് മൂവാറ്റുപുഴയിൽ വൈദ്യുത ലൈനിൽ നിന്ന് ഷോക്കേറ്റ് പതിനൊന്ന് വയസുകാരൻ മരണപ്പെട്ടത് (eleven year old boy died by electrocution Muvattupuzha). ഇതര സംസ്ഥാന തൊഴിലാളിയുടെ മകൻ റബീഉൽ ഹുസൈൻ ആണ് മരണപ്പെട്ടത്. കുട്ടിയും സഹോദരനും ചേർന്ന് ആക്രി സാധനങ്ങൾ ശേഖരിക്കുന്നതിനിടെ, പൊട്ടിവീണ വൈദ്യുത കമ്പിയിൽ പിടിക്കുകയായിരുന്നു (electrocution death Ernakulam).

അപകടത്തിൽ സഹോദരനും പരിക്കേറ്റു. ഷോക്കേറ്റ കുട്ടിയെ രക്ഷിക്കാൻ ശ്രമിക്കുന്നതിനിടെയാണ് സഹോദരനും പരിക്കേറ്റത്. നാട്ടുകാരെത്തി വിവരമറിയിച്ചതിനെ തുടർന്നാണ് കെഎസ്‌ഇബി ഉദ്യോഗസ്ഥരെത്തി വൈദ്യുതബന്ധം വിച്ഛേദിച്ചത്. അതേസമയം പൊട്ടിവീണ ലൈനിലെ വൈദ്യുതി വിച്ഛേദിക്കുന്നതിൽ കെഎസ്‌ഇബി ഉദ്യോഗസ്ഥർക്ക് വീഴ്‌ച സംഭവിച്ചുവെന്ന ആരോപണവും ഉയർന്നിരുന്നു.